Primeiru-Ministru intrega nia deklarasaun de beins ba Komisaun Anti Korupsaun
Primeiru-Ministru Dr. Rui Maria de Araújo, ho jestu simbóliku, intrega nia deklarasaun de beins ba Komisaun Anti Korupsaun (KAK), bainhira partisipa iha aniversáriu KAK nian ba dalima iha Salaun Nobre Ministériu Negósius Estranjeirus no Kooperasaun iha Praia-dus kokeirus (20/02).
Ne’e hanesan aktu polítiku boa vontade husi Xefi Ezekutivu, atuhodi promove Guvernasaun ida nakloke no Transparenti.
Primeiru-Ministru iha nia diskursu hateten katak impakte korrupsaun nian ba-iha sosiedade no dezenvolvimentu país nian prejudika kualidade moris ema kiak sira nian. Rui Araújo hatutan tan katak, rezultadu hosi lalaok aat hirak ne’e ba-iha dezenvolvimentu ekonómiku la dudu empreza sira atu mai investe iha rai laran. Tan ne’e, korrupsaun ne’e hahalok ida ne’ebé labele tolera no tenke hetan kastigu bainhira iha evidensia forte.
Rui Maria de Araújo hatutan tan katak povu timoroan la sakrifika nia aan durante luta ba libertasaun atu haree nia rain mout ba-iha korupsaun. Tan ne’e, nia hateten katak la iha razaun ida atu simu lalaok aat hirak ne’e, hodi husik hela abut moris ba-iha sosiedade nia le’et. Primeiru Ministru hateten tan katak Timor-Leste presiza komisaun Anti Korupsaun ida forte nu’udar instituisaun, hodi banati tuir prinsípiu sira rigór no firmeza bainhira kombate aktu korupsaun no ezije ba Governu atu iha responsabilidade no onestidade bainhira hala’o kna’ar sira.
Primeiru-Ministru subliña katak, Governu daneen kompromete atu fó apoiu tomak ba KAK atu hala’o ninia kna’ar sira iha Timor-Leste liuhosi lei sira ne’ebé fó dalan atu hetan objetivu sira.
Iha biban ida ne’e, Primeiru Ministru mós fó ninia agradesimentu ba Eis Komisáriu KAK nian, Adérito de Jesus Soares ne’ebé ho nia esforsu hotu fó ona vida ba instituisaun ida ne’ebé presta servisu importante tebe-tebes ba país. Nune’e mós, Primeiru-Ministru agradese ba Komisáriu foun ne’ebé ho laran kmaan simu kargu ida ne’e no aprezenta, hanesan jestu simbóliku, nia deklarasaun kona-ba rikusoin ba KAK.
Aniversariu KAK nian dalima ida ne’e hetan mós partisipasaun husi eis Titulár órgaun soberania nian, Membru Governu, Korpu Diplomátiku no elementu Sosiedadi Sivil Timor-Leste nian.
