Governu Timor-Leste

Prezidénsia Konsellu Ministrus

V Governu Konstitusionál

..............................................................................................................................

Díli, Loron 20 Fulan-janeiru Tinan 2015

Komunikadu Imprensa

Sorumutu estraordinária Conselho de Ministros loron 20 fulan-janeiru 2015

Konsellu Ministrus hala’o sorumutu estraordinária iha tersa-feira ne’e, loron 20 fulan-janeiru 2015, iha sala sorumutuk Conselho de Ministros [Konsellu Ministrus], iha Palásiu Governu, iha Díli, atu prepara servisu hirak atu hala’o iha Oe-Cusse Ambeno, iha loron 23 fulan-janeiru.

Halo tiha ona preparasaun liuliu kona-ba tema hirak atu debate iha sorumutuk estraordináriu Konsellu Ministrus nian ne’ebé sei hala’o iha Pante Macassar, kapitál distritu/munisípiu Oe-Cusse Ambeno, iha sesta-feira ne’e.

Konsellu Ministrus mos aprova ona, Rezolusaun Governu ne’ebé aprova nomeasaun Administradór Conselho de Administração de Autoridade Nasionál das Telecomunicações (ANCT), [Konsellu Aministrasaun Autoridade Nasionál Telekomunikasaun nian sira (KAANT)].

Sira ne’ebé hetan nomeasaun – liuhosi proposta Ministru Transportes no Telekomunikasaun nian, ne’ebé maka responsável hodi tutela telekomunikasaun – maka Sra. Matilde Amaral Canizio ba kargu Administradór finanseiru Autoridade Nasionál Telekomunikasaun nian sira, Sr. João Olívio Freitas ba Administradór tékniku, Sr. Fernando Afonso da Silva no Sra. Joana Lourença Belo ba kargu hirak hanesan Administradór naun-ezekutivu sira, ho tempu parsiál.

Administradór hirak hetan nomesaun ne’e mesak ema ne’ebé iha aptidaun, esperiénsia profisionál no kapasidade hirak ne’ebé bele fundamenta katak sira nia perfíl ne’e adekuadu atu kaer kargu hirak ne’e.

Atu hanoin hikas de’it katak, Autoridade Nasionál Telekomunikasaun (ANCANK) ne’ebé harii, tuir Dekretu-Lei n.^u 15/2012, loron 28, fulan-marsu. Autoridade ne’e maka institutu públiku ida ne’ebé ho ninia misaun atu hala’o funsaun sira hanesan entidade reguladora ba setór telekomunikasaun nian.