Governu Timor-Leste

Sekretaria Estadu Komunikasaun Sosial (SEKOMS), sei organiza training/workshop kona-ba Jornalizmu investigativu iha Dili durante loron tolu, hahú 17 – 19 Dezembru 2014 ba jornalista husi media imprimi no media eletronika iha Timor-Leste, no konvida formadór sira mai hosi LPDS (Lembaga Pers Dokter Soetomo), Jakarta, Indonésia. Training/Workshop sei hala’o iha Otel Novo Turizmo, Dili Timor-Leste.

Objetivu husi treinamentu ne’e, atu kontinua hametin kapasidade Jornalistas, editór no Xefé Redasaun sira iha aspeitu jornalismu investigativu, jornalizmu dame no jornalizmu dezenvolvimentu, nudar dalan atu hasa’e kualidade publikasaun no partisipasuan ativu media ba dezenvolvimentu povu nia moris di’ak.

Iha atividade training/WORKSHOP ne’e sei fahe ba parte rua, parte dahuluk, (loron 15 – 16 Dezembru), Formadór sira hosi LPDS sei halo vizita ba instituisaun media balun ne’ebé entre formandu (Jornalista) ne’ebé tuir ona formasaun durante fulan rua iha Jakarta, Indonésia hodi halo diskusaun no troka imprisoins kona-ba oinsa atu fó atensaun kontinua hosi parte hothotu nian ba evolusaun formandu sira nian hafoin termina sira nia formasaun. Aleinde ne’e fo oportunidade ba instituisaun media sira hodi esplora posibilidade atu halo kooperasaun entre instituisaun media sira iha Timor-Leste no Indonésia, liu hosi LPDS tuir rekomendasaun sira hosi relatóriu formasaun fulan rua nian ne’e. Instituisaun sira ne’ebé sei vizita mak hanesan, Jornál Timor Post, Grupo Media Nasionál, STL Media Group, Jornál Independente, RTTL.EP no Rádiu Timor Kmanek.

Parte daruak nian mak, Workshop Nasionál durante loron tolu (loron 17 -19 Dezembru). Iha Workshop ne’e sei aprezenta sesaun hitu, durante loron tolu. Sesaun idaidak konta ho péritus internasionál no nasionál, ho aprezentasaun durante minutu 30 to’o minute 50 ba sesaun palestra nian, iha loron dahuluk, no ba oradór save sira ka formadór sira ne’ebé konvida, sei aprezenta sira nia materia durante oras ida ka to’o oras rua nia laran. Iha sesaun sira aprezentasaun materia ne’e nian ne’e, formadór sira sei fó mós pratika ezersisiu atu nune’e bele oriente partisipante sira atu hatene lolos, mundu jurnalismu investigavu nian.

Tópiku sira iha treinamentu workshop ne’e kompostu hosi  Dever konstitusional governu haforte media no servisu jurnalismu iha Timor Leste liga ba formasaun jornalistas, Relasaun Ofisiál Komunikasaun Sosiál Estadu nian ho Servisu Journalizmu nian, Kualidade media no servisu jurnalismu iha Timor Leste: dezafiu no estrtejia sira atu haforte , papel no knaar organizasaun jornalistas ba kapasitasaun jornalistas no servisu jurnalismu, Regulasaun sira ba haforte no suporta kapasitasaun no papel media no servisu jurnalismu iha Timor Leste, Desafiu ba Profisionalizmu no Idealismu Jornalismu nian (Esperiensia Timor-Leste no Indonesia Nian).

Iha atividade ne’e, SEKOMS indika oradór nasionál no formadór Internasional. Oradór Nasionál kompostu husi, Sekretáriu Estadu Komunikasaun Sosiál, Nélio Isasc Sarmento,  Aderito Hugo da Costa (Vise Prezidente Parlamentu Nasionál),  Salvadór Ximenes (Prezidente STL Media Group), Emanuel Braz, (Diretór Ezekutivu The Díli Weekly News Paper) no  Júlio da Silva Guterres (fundadór CJITL no Membru AJTL).

Entertantu Oradór no Formadór Internasionál husi Lembaga Pers Doktor Soetomo (LPDS) kompostu husi Dr. Priyambodo R.H, Diretór Ezekutivu, no dosente na’in tolu,  Petrus Suryadi Sutrisno,  Dr. Abdullah Alamudi no Dr. Warief Djajanto Bassorie.

Orsamentu atu finansia Training/Workshop ne’e mai hosi Sekretaria Estadu Komunikasaun Sosiál, Diresaun Nasionál Diseminasaun Informasaun (DNDI), no konta ho partisipasaun idea hosi formandu 25 lima, ne’ebé termina ona sira nia kursu iha LDPS, Jakarta.