Ministru Defeza Nasionál Portugál nian vizita Timor-Leste atu hala’o sorumutuk bilaterál
Primeiru-Ministru no Ministru Defeza no Seguransa, Kay Rala Xanana Gusmão, iha loron 25 fulan-novembru, iha Palásiu Governu nian, iha Dili, simu Ministru Defeza Nasionál Portugál nian, José Auiar-Branco.
Ministru Defeza Portugál nian simu ho onra militár nian, hodi nune’e, hahú vizita durante loron rua iha Timor-Leste, loron 25 no 26 fulan-novembru, ho sorumutuk bilaterál ida ho ninia omólogu. Iha sorumutu ne’e sira ko’alia kona-ba asuntu hirak ne’ebé iha relasaun ho kooperasaun iha setór Defeza nian, ne’ebé mantein nafatin husikedas tinan 2002 liubá.
Iha sorumutuk bilaterál ne’e nia rohan, Xanana Gusmão no José Pedro Aguiar-Branco asina Memorandu Entendimentu nian ida kona-ba Sentru Lian Portugés, ne’ebé sei harii iha Sentru Formasan no Treinu ba FALINTIL-Forsa Defeza Timor-Leste (F-FDTL) nian, iha Metinaro.
Memorandu Entendimentu ne’e mosu iha sekuénsia husi Programa-Kuadru Kooperasaun Tékniku-Militár Luzu-Timorense ba tinan 2014-2016, ne’ebé asina tiha ona hahú iha tinan ida ne’e iha Lisboa, no ninia objetivu mak atu promove ensinu lian portugés nian ba militár sira. Timor-Leste maka sei finansia konstrusaun infra-estrutura ne’e no ekipamentu sira, Portugál maka kaer responsabilidade kona-ba programa no konteúdu sira no mós formadór no monitór sira.
Timor-Leste no Portugál mós sei fó-sai, komunikadu konjuntu ida, ne’ebé bele konsulta iha-ne’e.
Sorumutu Bilaterál ne’e liutiha, Ministru Defeza Nasionál, José Pedro Aguiar-Branco sei iha ajenda, ba-iha loron 26 fulan-novembru ne’e, maka hanesan hasoru malu ho Prezidente Repúblika, Taur Matan Ruak, vizita ida ba Kuartél Jenerál F-FDTL nian no ba Institutu Defeza Nasionál nian.
