Governu Timor-Leste

Ministru Estadu no Negosius Estranjeirus no Koperasaun, José Luis Guterres, ho Ministru Negosius Estranjeirus Jamaica, Arnold J. Nicholson Q. C, iha loron 27 Setembru 2014, assina Deklarasaun Konjunta hodi estabelese relasaun diplomatika entre nasaun rua ne’e, iha Nova Yorke.

José Luis Guterres haktuir “objetivu komum ba estabelesimentu relasaun diplomatika ne’e para bele hametin liu tan lasu amizade entre nasaun rua ne’e i nune’e mos oinsa atu estabelese koperasaun iha area diplomatika, politika, ekonomika, humanitaria no mos are seluk nudar meiu atu kontribui ba paz i seguransa iha reziaun”.

Deklarasaun Konjunta ne’e hatudu rai rua ne’e nian hakarak atu estabelese relasaun diplomatika tuir prinsipiu Direitu Internasional, nune’e mos tuir meta no objetivu Karta Nasõens Unidas nian, liu-liu konabá promosaun pas ho seguransa internasional, respeitu ba igualdade, soberania nasional, independensia, integridade territorial entre Estado sira no prinsipiu la interfere iha assuntu internu Estadu seluk nian, nune’e mos konabá adezaun ba tratadu internasional sira.

Estabelesimentu relasaun diplomatika entre rai rua haktuir iha Konvensaun Viena konabá Relasõens Diplomatikas, loron 18 Abril 1961, hahu hosi data ne’ebé rai rua ne’e assina deklarasaun konjunta.

Jamaika, rai ida ne’ebé, nia ekonomia depende ba kafe, mineral, turismu no rekursus seluk. Timor-Leste pronto no iha vontade diak atu halao koperasaun bilateral diak ho Jamaika ba futuru.