Vise-Primeiru-Ministru inaugura ponte Koeluil Maklau
Vise-Primeiru-Ministru, Fernando La Sama de Araújo, akompaña hosi Prezidente Komisaun E, Pedro dos Reis Martires no Diretór Nasionál Estrada, Ponte no Kontrolu Xeias, Rui Hernani, iha 13 Setembru 2014, inaugura ponte Koeluil Maklau ho nia naruk metru 45 no luan metru 3 iha suku Mauchiga, subdistritu Hato Builico, Ainaro.
Ponte Koeluil Maklau liga aldea Leotelu, suku Nunumoge ba suku Mausiga, ne’ebé finansiamentu hosi orsamentu estadu 2012 ho valór dolár USD $ 982, 511.00 (rihun atus sia, ualunulu resin rua, atus lima sanulu resin ida), ezekuta husi hosi kompañia Marino Enterprises, Lda. Obra ne’e hahú iha 28 Juñu 2012, ho durasaun tinan rua fulan tolu.
Iha biban ne’e, Vise-Primeiru-Ministru, Fernando La Sama de Araújo hateten, rehabilitasaun ba ponte sira importante tebes, hanesan parte ida husi dezenvolvimentu infraestrutura.
Ba Fernando La Sama Araújo, ponte ida-nee iha memoria ida importante iha tempu funu, luta ba independensia. “Se imi hatene Jakarta 2, ruin ne’ebé naklekar iha ne’ebá-ne’e”, Vise-Primeiru-Ministru hateten.
Ruin sira-nee hosi foin-sa’e no matenek oan sira, feto-mane, barak liu husi Mausiga, Goulor, Leutema no Nunumoge. Monumentu ida, sei harii monumenu ki’ik oan ida, atu kontinua fó onra nafatin, ba sira ne’ebé mate ba rai ida-nee”, Vise-Primeiru-Ministru haktuir.
Diretór Nasionál Estrada, Ponte no Kontrolu Xeias, Rui Hernani, hateten, ponte ne’e atu liga fasilita sirkulasaun populasaun hosi mota sorin ba mota sorin.
“Husu ba ita boot sira tau matan didi’ak. Karik iha buat ruma aat, informasaun lalais atu ami bele hadi’a ka halo manutesaun. Nune’e bele uza ba tempu naruk”, Diretór hateten.
Adjuntu Adminstradór Distritu Ainaro, Francisco Barros rekuñese ho inaugurasaun ne’e ema hotu bele satisfeitu, transporta produtu lokál ba iha merkadu, kompara ho tinan barak liu ba.
“Lori povu iha Hatubuiliku agredese ba Governu. Iha futuru sei hatutan tan programa ne’e liu hosi aspirasaun povu, atu nunee bele halo enduresimentu ba estrada ida-ne’e, tanba subida maka’as”, Adjuntu Administradór informa.
Partisipa mós iha serimónia ne’e, Prezidente Komisaun E, Pedro dos Reis Martires, Deputadu Parlamentu Nasionál, Osorio Florindo, Manuel Castro, autoridade lokal no lider komunitáriu sira iha distritu Ainaro no mós konvidadu sira.
