Governu Apoiu Benefisiáriu 20 Hodi Estabelese Loja do Povu
Ministru Komérsiu Indústria no Ambiente, António da Conceição, akompaña hosi Vise Ministru Komérsiu no Ambiente, Abel da Costa Ximenes, no Sekretáriu Estadu Komérsiu, Ricardo Cardoso Nheu, Iha 4 Setembru 2014, iha edifísiu Ministériu Komérsiu Indústria no Ambiente (MKIA), asina akordu ho grupu benefisiáriu hamutuk 20 hosi distritu ne’ebé sei estabelese Loja do Povu.
Distritu hirak ne’ebé hetan apoiu mak, distritu Ainaro, Bobonaro, Baukau, Ermera, Manatutu, Manufahi, Lautem, Likisá, Oekussi, Kovalima no Vikeke ho montante orsamentu hamutuk USD $ 5,000.00 kada Loja do Povu.
“Ami halo ona lansamentu Loja do Povu, too área remotas ka distritu sira ne’ebé dook. Ami hili benefisiáriu sira hodi asina akordu atu servisu hamutuk, hanesan, instrumentu liña ministériu ninian iha subdistritu atu sira bele halo atuasaun ba intervensaun merkadu iha subdistritu, liga subdistritu”, Ministru Komérsiu Indústria no Ambiente, António da Conceição dehan.
Loja do Povu mak konseitu ida no instrumentu polítiku ministériu, atu tulun populasaun sira, sai husi problema sasan folin karun no mós kualidade ladun di’ak. Ministériu nia responsabilidade mak kontrola presu no kualidade.
Governu iha responsabilidade atu fó apoiu kiik hodi bele dezenvolve negósiu ba oin. Maibé, asegura nafatin Governu nia polítika atu estabiliza presu iha subdistritu sira.
“Hein, distritu sira seluk ne’ebé mak imi reprezenta ne’e ho imi nia atuasaun ne’e bele fó impaktu ba iha populasaun sira nia moris iha distritu”, António da Conceição hateten.
Diresaun Nasionál Kooperativa Mikro Pequena Emprezas mak sei halo kontrolu no fó nafatin apoiu, entermus formasaun no jestaun.
