Governu Timor-Leste

Primeiru-Ministru, Kay Rala Xanana Gusmão, vizita Melbourne, hosi loron 15 to’o loron 20 fulan-setembru, dezloka hosi sidade Austrália nian ne’e, ba fali Nova Iorque, no sei hela iha ne’ebá hosi loron 21 to’o loron 27 fulan-setembru.

Primeiru-Ministru hala’o daudaun vizita-serbisu ida iha Melbourne, ne’ebé sei lidera eventu importante balu.

Bainhira to’o ona iha Nova Iorque, Kay Rala Xanana Gusmão, partisipa nu’udar oradór ba-iha Sesaun da-69 Asembleia Jerál Nasoens Unidas (AJNU) no eventu nível altu ida hosi g7⁺ , ne’ebé sei hala’o paralelamente iha AJNU.

Melbourne

Iha Melbourne, Primeiru-Ministru, akompaña hosi Governadór-jerál Austrália nian, Sua Exelénsia Sir Peter Cosgrove, halo diskursu iha konferénsia internasionál ida hodi komemora aniversáriu INTERFET nian ba da-15. Konferénsia ida-ne’e sei konta ho prezensa hosi atór-xave sira ne’ebé iha Timor-Leste, iha tinan 1999, hosi Austrália, Indonézia no Ázia. Hafoin diskursu, Primeiru-Ministru iha sorumutuk formál ida ho Governadór-jerál Austrália nian. Primeiru-Ministru sei partisipa mós iha han-kalan ofisiál konferénsia nian.

Xanana Gusmão mós sei entrega Medalla Solidariedade Timor-Leste nian ba ativista sira-ne’ebé apoia ona ba luta rezisténsia. Serimónia Investidura sei hala’o iha Salaun Liurai-feto Parlamentu Vitória nian no sei konta ho prezensa hosi komunidade timoroan rai ne’ebá.

Primeiru-Ministru mós sei marka prezensa iha han-meiudia espesiál ida  ba negósiu nian hodi promove investimentu no oportunidade sira negósiu nian iha Timor-Leste. Han-meiudia ne’e sei konta ho prezensa hosi emprezáriu austrália oioin ne’ebé iha reputasaun di’ak, fó oportunidade ida hodi promove dezenvolvimentu ekonómiku no hamoris empregu iha Timor-Leste.

Nova Iorque

Iha Nova Iorque, iha loron 22 fulan-setembru, Primeiru-Ministru sei halo diskursu iha eventu nível altu g7⁺ nian.

Ho tema “Pás” no “instituisaun kompetente”, hanesan objetivu autónomu Ajenda Dezenvolvimentu Pós-2015 nian: Perspetiva g7+, eventu ne’e sorumutu Ministru sira g7+, Reprezentante Permanente nian sira, membru sira “Diálogu Internasionál” no parseiru sira-seluk, hodi ko’alia liubá importánsia atu hatama objetivu sira-ne’e iha enkuadramentu Pós-2015, atu nune’e bele sai transformadór loloos no hatene kona-ba nesesidade no realidade sira iha sékulu XXI nian.

Iha loron 25, Xanana Gusmão hato’o tan diskursu ida iha Nasoens Unidas, ba okaziaun Sesaun da-69 Asembleia Jerál Nasoens Unidas, nune’e, hakotu ona ninia viajen-serbisu nian.

Primeiru-Ministru fila mai Timor-Leste iha loron 30 fulan-setembru.