Semináriu I kona-ba Governu Eletróniku
Ministériu Prezidénsia Konsellu Ministru, ho apoiu husi Ministériu Finansas, Ministériu Negósius Estranjeirus no Kooperasaun, Ministériu Transportes no Komunikasaun no Sekretária Estadu ba Fortalesimentu Institusionál hala’o semináriu I kona-ba Governu Eletróniku ho tema “Kestaun atuál no orientasaun sira iha futuru”, ne’ebé hala’o iha loron 27 fulan-agostu, iha Sentru Koñesimentu Ministériu Finansas nian.
Governu Eletróniku, ne’ebé refletidu iha Planu Estratéjiku Dezenvolvimentu (tinan 2011-2030), hakarak fasilita sidadaun sira asesu ba informasaun no ba servisu hirak ne’ebé Governu disponibiliza.
Semináriu ne’e, ne’ebé ho objetivu atu fahe ba malu buat hirak ne’ebé halo ona no esperiénsia sira iha dezenvolvimentu Governu Eletróniku nune’e mós diskute kestaun atuál no orientasaun sira iha futuru kompostu husi sesaun 3; Rede Governu nian, Internét no Kuadru Legál; Prestasaun Servisu Online Governu nian; Jestaun kona-ba Rekursu Teknolojia Informasaun nian sira. Molok sesaun temátika sira ne’e, Prezidénsia Konsellu Ministru aprezenta ona rezultadu sira husi estudu ida ne’ebé halo tiha ona, dezde fulan-fevereiru to’o fulan-agostu, kona-ba temátika ne’e no ne’ebé sai mós hanesan baze ba diskusaun iha sesaun sira.
Abertura no enseramentu eventu ne’e nian Sekretáriu Estadu Konsellu Ministru, Avelino Coelho, maka halo. Sira ne’ebé maka sai hanesan oradór maka Ministru Saúde, Sérgio Lobo, Prezidente Autoridade Nasionál Komunikasaun, Diretór-Jerál no Diretór IT nian sira no sira seluk tan.
Durante loron ida, oradór no partisipante sira debate no analiza ho forma krítika kona-ba vantajen no dezvantajen sira, kestaun prinsipál no tipu servisu sira husi programa sira kona-ba Governu Eletróniku. Bazeia ba konsiderasaun hirak ne’e maka sei prepara planu asaun nian ida atu introdús no dezenvolve estratéjia programa ne’e nian.
Governu Eletróniku sai hanesan inisiativa ida ne’ebé prezente mós iha nasaun sira hotu husi Komunidade Nasaun Lian Portugés sira (CPLP), no Konferénsia Governu Eletróniku CPLP I, hala’o tiha ona iha Lisboa iha tinan 2013, no edisaun daruak kona-ba inisiativa ida ne’e iha fulan-novembru tinan ne’e iha Luanda.
