Governu Timor-Leste

Ministériu Solidariedade Sosiál (MSS) harii tan Jardim Herois rua ba Martires da Patria iha Quelicai (Lubuwai) distritu Baucau no Uatulari (Suku Matahoi), distritu Viqueque ho orsamentu hamutuk $500.000 Dollares Amerika.

Atu realiza konstrusaun ne’e, MSS asina akordu ho Kompañia Twins Dragon no Bebui Unipesoal Lda iha edifisiu MSS, Kaikoli, Dili, Sesta-Feira, 8 Agostu 2014.

Hafoin assina akordu, Ministra Solidariedade Sosiál, Isabel Amaral Guterres hateten, orsamentu ba projetu rua ne’e maihusi orsamentu tinan fiskal 2014.  “Kompañia sei halo hotu obra ne’e no finalize iha 08 Novembru 2014. Ba oin sei hakoi mós Restus Mortais seluk hodi rekonhese ba ita nia Mártires sira ne’ebé mate ona ba rai ida ne’e”, Ministra Isabel dehan.

Entertantu, Vise-Ministru Solidariedade Sosiál, Jacinto Rigoberto Gomes de Deus hateten, MSS deside atu fó apoiu material konstrusaun ba uma kain 10 iha Quelicai, ne’ebé sei hetan muda husi fatin konstrusaun Jardim Heroi ne’e.

Uma kain hirak ne’e, tuir Vise Ministru, iha direitu, atu hetan apoiu hosi MSS. Antes ne’e, ekipa MSS halo ona verifikasaun ba familia 10 ho nia kondisaun uma, hatudu uma sira-ne’e laos permanente. MSS sei tulun sira liuhusi pakote dezastre nian. “ Fusu ba família sira atu halo fali uma iha fatin seguru, hodi familia sira bele hela ba,” Jacinto hateten tan.

Koordenador Projetu, Lorenço José Cabral informa, oras iha restu mortais hamutuk 418, maibé identifika tan na’in 280, atu foti iha Setembru 2014. “Hakarak ka lakohi tenki remata no entrega ba Governu iha fulan Novembru mai,” nia hateten.

Partisipa iha serimonia assina akordu neé, Sekretáriu Estadu Assuntos Kombatentes Libertasaun Nasionál, Júlio Sarmento da Costa (Meta Mali), Diretór Jerál MSS, Eugénio João A. M. Soares, Xefe Gabinete MSS, José da Conceição, Diretór no funsiunariu sira.