Vise-Primeiru-Ministru inaugura Ponte Belulik
Vise-Primeiru-Ministru, Fernando La Sama de Araújo akompaña hosi Ministru Obras Públikas, Gastão de Sousa iha loron 1 Agostu 2014, inaugura ponte Belulik iha suku Soro, Sub distritu Hatudu, distritu Ainaro ho nia naruk metru 180 no luan metru 6.
Ponte Belulik liga Sub-distritu Hatudu bá Ainaro liu hosi suku soro no hatudu liga ba kasa no subdistritu Zumalai ne’ebé finansiamentu hosi Orsamentu Jerál Estadu (OJE) 2011 iha fundu infraesturutura ho totál orsamentu USD $ millaun 5 resin, ne’ebé kaer hosi kompañia Posco Plan engenering company limited, Korea.
Vise Primeiru-Ministru, Fernando La Sama de Araújo agradese ba esforsu harii ponte ne’ebé liga suku Leolima no Soru kraik iha Hatudu no Ainaro.
“Fatin ida-ne’e iha istoria boot. Uluk ita-nia Komandante Xanana halo rezisténsia no gerrileiru sira, barak mak mate iha fatin ida-ne’e. Ha’u konsidera, ponte ida-ne’e la’ós de’it simbólu fíziku ne’ebé liga, maibé iha mós ninia valór balun ne’ebé mak ita dedika iha memoria ba ita-nia asuwain sira ne’be mak mate iha fatin ida ne’e” Vise PM hateten.
Tuir La Sama de Araújo, ponte ne’e sei bele hamoris ema-nia movimentu no atividade ekonómia. “Husu ita-boot sira atu tau matan didi’ak ba fasilidade ne’e. Konstrusuan sira-ne’e, ejize mós ita-nia responsabilidade,” nia dehan tan. Nia mós husu ba Ainaro-oan, atu fó liman ba malu dezenvolve distritu rasik. Governu, tuir eis Prezidente Parlamentu Nasionál ne’e, kria kondisaun ba dezenvolvimentu. Nune’e, ema hotu tenki haka’as aan hodi dezenvolve distritu sira.
Ministru Obras Públika, Gastão de Sousa husu ba populasaun tomak no Administradór Distritu no Sub-distritu, atu hamutuk ho populasaun tau matan ba fasilidade ne’e, hodi lori benefisiu di’ak no kleur to’o jerasaun foun sira.
