Governu Timor-Leste

Primeiru-Ministru Xanana Gusmão simu Primeiru-Ministru Portugal, Pedro Passos de Coelho, iha Palásiu Governu iha sorumutuk bilaterál ida ne’ebé hala’o iha loron 24 fulan Jullu, nu’udar mós  Vizita Ofisiál ba dala uluk ne’ebé mak Xefi Governu Portugués ida halo ba Timor-Leste.

Halo tiha inspesaun ba Guarda Onra, Primeiru-Ministru rua ne’e no sira nia delegasaun sira hala’o sorumutuk iha Sala Konsellu Ministru nian, hodi ko’alia kona-ba área kooperasaun bilaterál oinoin - Edukasaun, Justisa, Finansas Públikas, Saúde, Defeza no Seguransa – ne’ebé mak reprezenta rasik husi Ministru no Sekretáriu Estadu sira nu’udar responsável ba pasta ne’e.

Sorumutuk liutiha, asina mós instrumentu jurídiku oioin entre Governu Repúblika Portugueza no Governu Repúblika Demokrátika Timor-Leste, ne’ebé sira ninia Primeiru-Ministru sira rasik maka sai hanesan testemuña.

Ministru Negósiu Estranjeiru no Kooperasaun, José Luís Guterres, no nia omólogu portugés, Rui Machete, asina Programa Estratéjiku Kooperasaun Portugal – Timor-Leste.

Ministru Edukasaun, Bendito Freitas, asina mós ho Ministru Negósiu Estranjeiru Portugal nian, Protokolu Kooperasaun nian ida kona-ba “ Projetu Partilla Pedagójika”.

Iha área saúde, Ministru Saúde nian sira husi Timor-Leste no Portugal, Sérgio Lobo no Paulo Macedo, asina Protokolu Kolaborasaun nian hamutuk haat: iha ámbitu Definisaun Perfíl sira adekuadu ba kargu Diresaun Superiór iha área Saúde ba organizmu sira Ministériu Saúde Timor-Leste nian; ho hanoin atu hasa’e kapasidade téknika no regulamentár; iha ámbitu formasaun ba profisionál sira ne’ebé mak mai integra Gabinete Membru Governu nian sira ka Ajénsia sira Ministériu Saúde Repúblika Demokrátika Timor-Leste nian no Protokolu Kolaborasaun nian ba kriasaun estrutura governamentál nasionál kona-ba emerjénsia pré- ospitalár iha Timor-Leste.

Iha mós Memorandu Entendimentu rua – ida iha domíniu juventude nian no ida seluk kona-ba desportu – ne’ebé asina husi Sekretáriu Estadu Juventude no Desportu Timor-Leste nian, Miguel Manetelu, no Sekretáriu Estadu Negósiu Estranjeiru no Kooperasaun Portugál nian, Luís Campos Ferreira.

Iha sorumutuk ofisiál ne’e nia rohan, Pedro Passos Coelho no Xanana Gusmão, halo deklarasaun ba imprensa ne’ebé sira hatudu tebes sira nia laran haksolok kona-ba sorumutuk ne’e. Xefe Governu sira Portugal ho Timor-Leste nian hatete katak iha área sira ne’ebé maka nasaun rua ne’e koopera no mós bele tulun no hakbiit setór seluk hanesan enerjia no ekonomia, maibé la haluha mós setór privadu no investimentu. Primeiru-Ministru na’in rua mós ko’alia kona-ba Lian portugés ne’ebé sai hanesan pilár aposta nian ida entre nasaun maun-alin rua ne’e, ne’ebé “la’os de’it ko’alia lian ne’ebé hanesan, maibé mós partilla istória no kultura komun ida”.

Partisipa iha Konferénsia da-X Xefi Estadu no Xefe Governu sira CPLP nian, Primeiru-Ministru Portugal, Pedro Passos Coelho, halo vizita ofisiál ida ba Timor-Leste husi loron 24 to’o 25 fulan Jullu.