Governu Timor-Leste

Durante sema rua ikus fulan Jullu nian, iha ámbitu Konfrénsia X Xefe Estadu no Xefe Governu CPLP nian sira iha Dili, Timor-Leste simu ukun-na’in husi nasaun ualu Komunidade ne’e nian, no mós Xefe Estadu Guiné Equatorial nian.

Delegasaun ida husi Repúblik Guiné Equatorial to’o iha Dili tersa  ne’e, loron 22 fulan Jullu, iha kapitál Timor nian, ne’ebé xefia husi ninia Prezidente, Teodoro Obiang Nguema Mbasogo, ba vizita ida durante loron rua nia laran, iha ne’ebé nia sei simu resposta ba ninia kandidatura ba membru CPLP nian. Mai hamutuk ho Prezidente Repúblika ne’e maka, Ministru Estadu rua (Ministru Estadu no Prezidénsia Repúblika Enkarregadu Misaun sira nian no Ministru Negósiu Estranjeiru no Kooperasaun); Ministru Delegadu Repúblika nian, Enkarregadu ba Seguransa Esteriór, Vise-Ministra Asuntu Esteriór no Kooperasaun, Embaixadór Guiné Equatorial nian iha Portugal; no mós Konselleiru sira, Diretór-Jerál sira, no sira seluk.

Maibé delegasaun dahuluk ne’ebé to’o iha kapitál Timor nian maka husi República Demokrática de São Tomé e Príncipe, iha domingu, loron 20 fulan  Jullu, ne’ebé komanda husi ninia Prezidente Repúblika, Manuel Pinto da Costa, ne’ebé hela iha nasaun ne’e iha loron haat nia laran. Delegasaun ne’e integra mós Ministra Negósiu Estranjeiru no Kooperasaun no Komunidade, Natália Umbelina, no Ministru Finansas,  Hélio Almeida Ginesio.

Iha segunda, loron 21, delegasaun rua husi Repúblika Angola to’omai, ba vizita ida durante loron tolu nia laran: ida ho Prezidente Asembleia Nasionál, Fernando Piedade Dias dos Santos, no ida seluk ho Vise-Prezidente Repúblika, Manuel Vicente. Marka mós prezensa iha Timor-Leste Sekretária Estadu Kooperasaun, Maria Angela Bragança.

Maibé iha tersa ne’e, loron 22, loron ida molok Konferénsia X Xefe Estadu no Xefe Governu CPLP nian, maka delegasaun governamentál nian barak liu ne’ebé hein atu to’o iha Dili, tuun iha Aeroportu Internasionál Nicolau Lobato.

Aleinde Prezidente Repúblika Guiné Equatorial nian, to’omai mós Xefe Estadu tolu: Prezidente Repúblika Cabo Verde, Carlos Fonseca no Prezidente Repúblika Moçambique, Armando Emílio Guebuza, ba vizita durante loron rua nia laran, no Prezidente Repúblika Portugal nian, Cavaco Silva, hamutuk ho Primeira-Dama, Maria Cavaco Silva, ne’ebé hela iha Dili durante loron tolu nia laran.

Husi Portugal mai mós, Primeiru-Ministru Pedro Passos Coelho, ne’ebé Aleinde partisipa iha Simeira Dili nian, halo mós vizita ofisiál ida ba loron rua iha Timor-Leste. Primeiru-Ministru Repúblika Portugal nian sai hanesan oradór prinsipál, hamutuk ho Primeiru-Ministru Xanana Gusmão no ho Ministra Finansas Emília Pires, iha Semináriu “Globalizasaun Ekonómika no Oportunidade Investimentu nian sira: CPLP no Rejiaun Ázia-Pasífiku” ne’ebé hala’o iha Sentru Konvensaun Dili, iha loron 24 fulan Jullu. Delegasaun Portugál nian integra mós Ministru Estadu no Negósiu Estranjeiru, Rui Machete, Sekretáriu Estadu Negósiu Estranjeiru no Kooperasaun, Luís Campos Ferreira, Ministru Saúde, Paulo Machedo no Sekretáriu Estadu Asuntu Fiskál, Paulo Núncio.

Repúblika Giuiné-Bissau reprezenta husi ninia Primeiru-Ministru, Domingos Simões Pereira, no mós husi Ministru Negósiu Estranjeiru, Mário Lopes da Rosa no Ministru Ekonomia no Finansas, Geraldo João Martins.

Repúblika Federativa Brasil nian xefia husi Vise-Ministru Relasaun Esteriór, Paulo Cordeiro Andrade Pinto.