Timor-Leste remata preparativu kona-ba Konferénsia Xefe Estadu no Governu CPLP nian ba Dala-Sanulu
Repúblika Demokrátika Timor-Leste iha loron 23 fulan Jullu, sei sai uma-na’in, ba Konferénsia Xefe Estadu no Governu CPLP nian ba Dala-Sanulu, ne’ebé sei hala’o iha Salaun Nobre Ministériu Negósiu Estranjeiru no Kooperasaun nian, iha Dili.
Komisaun Preparasaun Simeira nian, ne’ebé prezide husi Fransisco Guterres Lu-Olo no kompostu hosi reprezentante sira husi Estadu-membru CPLP ida-idak, hamutuk ho Gabinete Apoiu Prezidénsia CPLP Ministériu Negósius Estranjeiru no Kooperasaun (MNEK) nian, remata dadaun ona preparativu sira ba eventu boot ida ne’e ne’ebé mak sei halibur iha kapitál Timor-Leste nian Prezidente Repúblika lubuk ida husi nasaun sira CPLP nian, no mós reprezentante boot selu-seluk husi nasaun no organizasaun mundiál sira.
Gabinete Apoiu ba Prezidénsia CPLP Ministériu Negósius Estranjeirus no Kooperasaun fó sai ona ajenda ba semana ne’ebé antesede Konferénsia Xefe Estadu no Governu CPLP nian ba Dala-Sanulu nian:
- Loron 17 no 18 fulan Jullu: Sorumutuk XXIX Pontu Fokál Kooperasaun nian sira – SPFK iha (Sala Konferénsia Institutu Diplomátiku MNEK nian);
- Loron 19 fulan Jullu: Sorumutu Grupu Tékniku kona-ba Preparasan da-175 CCP nian (Sala Konferénsia Institutu Diplomátiku MNEK nian);
- Loron 21 fulan Jullu: Sorumutu da-175 Komité Konsertasaun Permanente – CCP (Salaun Konferénsia Institutu Diplomátiku MNEK-nian);
- Loron 22 fulan Jullu: Sorumutu XIX Konsellu Ministru nian (Salaun Nobre MNEK nian);
- Loron 23 fulan Jullu: Konferénsia Xefe Estadu no Governu CPLP nian ba Dala-Sanulu (Salaun Nobre MNEK nian);
Fatin Konferénsia nian ne’e sei loke de’it ba ema ne’ebé hetan akreditasaun ne’ebé válida, tanba ne’e hahú husi loron 7 fulan Jullu, Ministériu Negósiu Estranjeiru no Kooperasaun sei disponibiliza Sala Akreditasaun nian ida ba delegasaun no konvidadu sira.
Komunikasaun sosiál tenke halo sira nia akreditasaun, liuhusi email, to’o loron 30 fulan Juñu. Hahú loron 7 fulan-Jullu sira bele foti ona akreditasaun ne’e iha guichet própriu ida iha Ministériu Negósiu Estranjeiru no Kooperasaun.
Atubele hetan akreditasaun bele haruka email ida ba Akreditasaun (Mariano Santos: mds11262@yahoo.com), ba Komunikasaun Sosiál (Joaquim Fernandes: joaquimfernandes2003@yahoo.com.br) ka ba Sub-Koordenasaun (Vânio Florival: vanio.florival@gmail.com) ka Renata de Jesus: bidera.renata@gmail.com)
Iha fatin sira ne’ebé eventu ne’e sei hala’o ba sei iha sala servisu nian ba komunikasaun sosiál nian ne’ebé sei kompleta ho komputadór no impresora, asesu ba Internét no televizaun. Pedidu entrevista nian sira tenke halo husi responsavel komunikasaun sosiál nian liuhusi email (Joaquim Fernandes: joaquimfernandes2003@yahoo.com.br ).
Aleinde kompañia aérea hirak ne’ebé baibain semo ba mai Timor-Leste, Garuda Indonézia nian mós sei semo ba mai Dili loroloron. Nu’udar buat ne’ebé bele nota ona, katak durante eventu hirak ne’e, asesu ba Aeroporto Internasionál Nicolau Lobato sei iha kondisaun nia laran.
Tuir Gabinete Apoiu ba Prezidénsia CPLP nian, to’o agora, sira hirak ne’ebé konfirma ona sira nia prezensa maka Prezidente República de Portugal, Cavaco Silva, Prezidente República de Moçambique, Armando Guebuza no Prezidente República de Cavo Verde, Jorge Carlos Fonseca. Prezensa Primeiru-Ministru Portugés nian, Pedro Passos Coelho, mós konfirmada ona.
Konvite sira haruka ona mós ba Nasaun viziñu sira hanesan Austrália no Indonézia, no mós ba Nova Zelándia, Japaun, Fiji no nasaun ASEAN nian sira hotu.
