Sorumutu Daruak “Yellow Road Workshop”
Governu Timor-Leste liuhosi Ministériu Finansa hala’o sorumutu ho parseiru dezenvolvimentu sira ho tema “Yellow Road Workshop”, iha loron 22 fulan Maiu, no objetivu hosi sorumutu ida ne’e mak atu envolve parseria dezenvolvimentu sira iha prosesu diskusaun hodi nune’e bele iha mekanizmu koordenasaun ne’ebé di’ak ba planeamentu no implementasaun programa dezenvolvimentu.
Iha sorumutu ida ne’e, Ministériu Finansa aprezenta rezultadu implementasaun orsamentu 2012-2013 no nia impaktu ba ekonomia hanesan kresimentu ekonómiku, inflasaun, empregu no investimentu públiku.
Ministra Finansa, Emilia Pires iha sesaun abertura hateten, “parseria dezenvolvimentu sira iha Timor-Leste ne’e la’os de’it embaixadór sira ka doadór sira, maibé ita-nia parseria dezenvolvimentu mak ita hotu, sosiedade sivíl, setór privadu, setór koperativu, igreja, no invetidór sira; tanba ne’e sorumutu ida ne’e importante atu ita hotu bele halo buat ida. Ita tenki fahe serbisu se mak atu halo ida ne’e, se la’e governu maka ba implementa fali. Buat sira ne’e mak ita koa’lia atu buka dalan ida ne’ebé di’ak duni atu lori Timor-Leste ba to’o duni 2030 ne’ebé ita hotu hakarak”.
Marka mós prezensa iha sorumutu ida ne’e, Ministra Solidadriedade Sosiál, Isabel Amaral Guterres, Prezidente Funsaun Públika, Engu. Libório Pereira, Parseiru dezenvolvimentu sira, reprezentante hosi Parlamentu Nasionál, ONG sira, Sosiedade Sivil, no mós diretór Jerál no Nasionál sira hosi Ministériu idaidak.
Atu hetan asesu ba Komunikadu Imprensa Porta-Voz Governu nian kona-ba assunto ne’e, hanehan iha ne’e.
