Governu fó apoiu ba atividade hakiak ikan tilápia iha Baukau
Iha loron 4 fulan-jullu tinan 2017, Ministru Estadu, Koordenadór Asuntus Ekonómikus (MEKAE) no Ministru Agrikultura no Peskas, Estanislau Aleixo da Silva, partisipa iha inaugurasaun programa akuakultura nian ida iha aldeia Bahu, iha Munisípiu Baukau.
Ministru ne’e hateten katak inisiativa atu hakiak ikan tilápia iha tanke, husi grupu Hadomi Natureza, hatudu vontade atu hadi’a ekonomia família nian iha Munisípiu Baukau.
Inisiativa grupu ida ne’e nian di’ak tebes, tanba ne’e ita fó tulun ba sira. Montante subsídiu husi Estadu, ne’ebé Gabinete MEKAE nian fó ne’e ki’ik, maibé ita sei kontinua fó apoiu ba sira”, Ministru ne’e hateten.
Aleinde ne’e, na’i-ulun ne’e hateten katak tékniku sira mós prontu atu fó apoiu ba atividade hakiak ikan sira-ne’e nian iha Munisípiu 12.
Grupu Hadomi Natureza ne’e ninia membru barak liu maka foin-sa’e, mane na’in 6 no feto na’in 5.
Iha inagurasaun programa ne’e nian marka mós prezensa Diretór-Jerál Peskas nian, Acácio Guterres.
