Sorumutuk Konsellu Ministrus loron 10 fulan-novembru 2015
Prezidénsia Konsellu Ministrus
VI Governu Konstitusionál
..............................................................................................................................
Díli, loron 10 fulan-novembru tinan 2015
Sorumutuk Konsellu Ministrus nian iha loron 10 fulan-novembru 2015
Konsellu Ministrus hala’o sorumutuk iha tersa-feira, loron 10 fulan-novembru tinan 2015, iha sala sorumutuk Konsellu Ministrus nian, iha Palásiu Governu, iha Dili, no aprova:
1. Desizaun hatama rekursu Akórdaun Kámara Kontas nian ne’ebé maka la simu Vistu Préviu ba kontratu konsesaun no konstrusaun Baze Abastesimentu Suai nian
Konsellu Ministrus analiza akórdaun Juis Koletivu sira Kámara Kontas Tribunál Rekursu nian ne’ebé la simu vistu préviu ba kontratu konsesaun no konstrusaun Baze Abastesimentu Suai nian, ne’ebé selebra ho konsórsiu enjenãria no konstrusaun HDEC-HEC, Koreia Sul nian. Tanba akórdaun ne’e, aprova ona projetu rekursu Governu nian, atu hatama hasoru Kámara Kontas nian.
2. Rezolusaun Governu nian kona-ba importánsia sándalu nu’udar aihoris ne’ebé sai símbolu valór nasionál nian
Polítika Nasionál no estratéjia sira ba-iha Setór Florestál define hanesan objetivu espesífiku ba protesaun floresta nian, iha ámbitu ne’ebé maka protesaun ba sándalu sai-nu’udar prioritáriu. Hosi forma ida ne’e, Konsellu Ministrus aprova Rezolusaun ne’ebé maka promove atividade sira plantasaun sándalu nian, atuhodi kumpri lei no regulamentu sira ne’ebé maka bele aplika ba protesaun ambiente nian no reprensaun ba sira ne’ebé maka halo esplorasaun ilegál ba floresta no produtu floresta nian sira.
3. Alterasaun dahuluk ba Orgánika Servisu sira Apoiu nian ba Tribunál sira
Proposta alterasaun ida ne’e ho objetivu atu hasai mresponsabilidade husi juíz sira ba xefia servisu administrativu sira apoiu nian ba tribunál sira , liuliu ba-iha área finanseira no patrimoniál, rekursu umanu no servisu judisiál, ba-fali kompeténsia Diresaun-Jerál Tribunál sira nian. Orgánika Servisu Apoiu nian ba Tribunál sira hetan tiha ona aprovasaun iha Konsellu Ministrus, iha loron 4 fulan-abril tinan 2012.
4. Alterasaun dahuluk ba Dekretu-Lei ne’ebé kria Autoridade Nasionál Petróleu nian
Hahú kedas iha nia kriasaun, ANP halibur no dezenvolve ona rekursu umanu no tékniku sira lubun ida, no mós koñesimentu no esperiénsia ne’ebé presiza hodi hala’o projetu hirak ne’ebé ho eskala boot no kompleksu. Regulasaun adekuadu setór mineiru nian hanesan elementu fundamentál ida ba dezenvolvimentu sosiuekonómiku país nian no aprovasaun regra foun lubun ida sei fó ba setór ne’e kuadru legál modernu ida, tuir prátika internasonál di’ak sira. Husi maneira ne’e, Konsellu Ministrus deside ona hodi altera estatutu ANP nian no fó ba-nia misaun foun entidade reguladora kona-ba atividade sira lisensiamentu nian no esplorasaun mineira.
Iha sorumutuk ne’e, Konsellu Ministrus mós analiza ona:
1. Projetu kontrusaun ponte foun Komoro [Comoro - lia-portugés] nian
Ministériu Obras Públikas, Transportes no Komunikasaun aprezenta ona projetu ponte foun Komoro nian. Hafoin harii tiha ponte CPLP [sigla iha lia-portugés], presiza hadi’a mós sirkulasaun rodoviária iha Dili, liuliu iha parte loro-monu no lorosa’e. Hahú husi kruzamentu edifísiu Timor Block nian to’o ba estrada nasionál Ao3 ne’ebé ho naruk boot liu kilométru 3.
