Grupu Istória no Kultura Vizita SEKOMSSekretáriu Estadu Komunikasaun Sosiál (SEKOMS), Merício Juvenal dos Reis “Akara” simu Estudante sira hosi eskola Santa Madalena de Canossa ne’ebé hola parte iha grupu hanaran Grupu Istória no Kultura (GIK) ho lema “Ami Labarik nia Hanoin Istória no Kultura”. Sorumutu ne’e hala’o iha Palásiu Governu, loron 20 fulan-setembru tinan 2018.
Sekretáriu Estadu Komunikasaun Sosiál, Merício “Akara hateten labarik sira maka futuru, tanba ne’e ita tenki tau atensaun ba sira, investe maka’as ba sira, apoiu sira-nia kriatividade no inisiativa sira ne’e. Hahú prepara sira hosi agora, prepara sira-nia talentu, karater no kapasidade.
Labarik sira mós iha kriatividade no hanoin inovativu, tanba ne’e ita hahú hanoin atu fó espasu ba sira hodi nune’e sira bele masimiza ka halo barak liután sira-nia programa sira, tenik Akara.
Grupu Istória no Kultura mai hosi eskola Santa Madalena de Canossa Has Laran, Comoro-Dili. Grupu ne’e kompostu hosi alunu hamutuk na’in 45 hosi ensinu báziku, Kuartu no Kintu anu sira.
Grupu ne’e nian atividade maka hanesan: divulga no halo diálogu ba labarik sira, iha mós dansa kulturál, drama, istória kona-ba rezisténsia, múzika tradisionál, hakerek istória, halo peskiza kona-ba poezia no vizita mós fatin istóriku sira. Aleinde ne'e iha mós atividade audiovizuál sira maka hanesan halo filmajen istóriku no aprezenta arte no siénsia liu hosi meiu oralidade.
