Governu inaugura sistema foun ba abastesimentu bee-moos iha Laleia ba ema maizumenus 2.700
Ministru Obras Públikas, Samuel Marçal, iha loron 26 fulan-setembru tinan 2026, inaugura sistema foun ba abastesimentu bee-moos iha Postu Administrativu Laleia, iha munisípiu Manatutu, ba populasaun maizumenus 2.700 hosi umakain 450, nune’e mós instituisoins públikas no komunidade oioin. 
Serimónia ne’e sura ho partisipasaun hosi Vise-Ministra-Finansas, Regina de Jesus Sousa, Sekretáriu Eletrisidade, Água no Saneamentu, Santos Noronha, Prezidente Konsellu Administrasaun no Prezidente Komisaun Ezekutiva Bee Timor-Leste, EP (BTL, EP), Gustavo da Cruz, Prezidente Autoridade Munisípiu Manatutu, Luís Inácio Henrique Fernandes, reprezentante autoridade lokál sira, lideres komunitárius, veteranus no membru komunidade sira.
Sistema foun ne’e kobre suku Lifau no Haturalan no mós aldeia Uma-Rentau, Lenao, Uma-Klalan, Ralan, Weboro no Uma-Iuk. Aleinde ligasaun ba umakain sira, infraestrutura ne’e mós garante fornesimentu bee ba instituisaun no instalasaun lokál sira, ne’ebé inklui postu saúde, eskola, Eskuadra Polísia Nasionál Timor-Leste nian iha Laleia no igreja.
Sistema ne’e, ho investimentu totál dolar amerikanu rihun 764,9, utiliza bee rai-okos ne'ebé hasai liuhosi perfurasaun, ho kapasidade litru 20 kada segundu, no fahe ba zona abastesimentu haat. Infraestrutura ne’e inklui kanalizasaun kilómetru 1,7 no rede distribuisaun nian kilómetru 19,3.
Instala mós rezervatóriu tolu, rezervatóriu ida ho kapasidade metru kúbiku 409 no rezervatóriu rua ida-idak ho kapasidade metru kúbiku 48, nune’e mós kontadór bee ne’ebé liga ba umakain hamutuk 450.
Durante serimónia ne’e, Ministru Obras Públikas destaka importánsia atu asesu bee-moos ba saúde públika no hadi’a kondisaun moris populasaun nian, hodi afirma katak “bainhira laiha bee, bele kria moras, no bee ne’ebé la moos bele mós kria moras. Bainhira falta bee, ita-nia isin no ita-nia saúde mós afetadu hotu. Tanba ne’e, bee importante tebes”.
Inaugurasaun ne’e hala’o iha ámbitu komemorasaun aniversáriu Bee Timor-Leste, EP ba da-neen, ne’ebé kria hosi Dekretu-Lei n. 41/2020, loron 25 fulan-setembru, hodi garante administrasaun servisu públiku ba abastesimentu bee-moos no saneamentu báziku.
Prezidente BTL, EP, Gustavo da Cruz, hateten katak disponibilidade sistema foun ne’e nu’udar solusaun ba difikuldade asesu ba rekursu bee iha Laleia no husu kooperasaun entre komunidade no autoridade sira hodi halo manutensaun ba infraestrutura bee ne’ebé konstrui ona.
Serimónia ne’e remata ho inaugurasaun simbóliku ba sistema ne’e no mós vizita ba infraestrutura armazenamentu no distribuisaun bee nian.
