Governu Timor-Leste

Governu, liuhusi Ministériu Komérsiu no Indústria, iha loron 28 fulan-agostu tinan 2026, lansa konstrusaun Merkadu foun Munisípiu Lautein nian, iha Lospalos, iha serimónia ida ne’ebé prezide husi Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, ho partisipasaun husi Ministru Komérsiu no Indústria, Filipus Nino Pereira, no Sekretáriu Estadu Kooperativas, Arsénio Pereira da Silva. 

Merkadu foun ne’e sei harii iha Lospalos, iha suku Fuiloro, ho responsabilidade Ministériu Komérsiu no Indústria nian, ho investimentu besik dolar amerikanu millaun 7,2 no prazu ezekusaun prevee ba tinan rua.

Ho lema “Merkadu Foun, Oportunidade Foun ba Dezenvolvimentu Ekonomia Lokál”, projetu ne’e ho objetivu atu kria kondisaun ne’ebé di’ak liu ba komersiante, produtór no konsumidór sira, no mós apoia dinamizasaun atividades ekonómikas iha munisípiu ne’e.

Iha serimónia lansamentu fatuk dahuluk, Vise-Primeiru-Ministru Mariano Assanami Sabino destaka katak merkadu foun ne’e tenke oferese ba komersiante sira espasu ida ne’ebé ho kondisaun di’ak liu kona-ba limpeza, ijiene no seguransa hodi fa’an no sosa produtu sira.

Vise-Primeiru-Ministru ko’alia mós kona-ba kontribuisaun komérsiu nian ba dezenvolvimentu ekonómiku, kriasaun oportunidade empregu no rendimentu, no mós hamenus kiak. Iha kontestu ida-ne’e, nia husu kolaborasaun hosi autoridade lokál no komunitária, komersiante sira, no mós populasaun durante ezekusaun serbisu, atu nune’e bele kontribui ba kualidade obra no kumpre prazu ne’ebé prevee ona.

Ministru Komérsiu no Indústria, Nino Pereira, afirma mós katak lansamentu ba konstrusaun Merkadu foun Munisípiu Lautein nian enkuadra iha polítika Governu Konstitusionál IX hodi promove dezenvolvimentu ekonomia lokál, liuhusi disponibilizasaun infraestruturas ne’ebé adekuadu.  Merkadu foun ne’e ho objetivu atu dignifika no asegura kondisaun ne’ebé di’ak liu ba atividade ekonómika produtór no vendedór sira nian, hodi nune’e sira bele komersializa sira-nia produtu iha ambiente ida ne’ebé seguru no saudavel, ne’ebé iha tempu hanesan, sei fó kondisaun ne’ebé di’ak liu no konfortu ne’ebé boot liu ba kompradór sira.

Prezidente Autoridade Munisípiu Lautein, Mélio de Jesus, agradese ba investimentu Governu nian no apela ba empreza ne’ebé responsavel ba ezekusaun projetu ne’e atu bele asegura kualidade konstrusaun no mós kumpre rekizitu no prazu ne’ebé estabelese ona.

Tuir Prezidente Autoridade Munisipál, merkadu foun ne’e tenke oferese kondisaun ne’ebé di’ak liu ba agrikultór, peskadór no komersiante sira atu komersializa sira-nia produtu no mós kontribui ba atividade ekonómika no ba rendimentu família nian.

Serimónia ne’e sura mós ho partisipasaun husi membrus Parlamentu Nasionál, reprezentante autoridade lokál no komunitária, veteranus, reprezentantes Igreja, komersiantes, estudantes, profesór sira, membrus Polísia Nasionál Timor-Leste, no mós komunidade lokál.