Timor-Leste selebra aniversáriu Konsulta Populár 30 Agostu 1999 ba da-27
Timor-Leste selebra aniversáriu Konsulta Populár 30 Agostu 1999 ba dala 27, ho programa komemorativu ida ne’ebé realiza iha loron 28 to’o 30 Agostu tinan 2026, iha munisípiu Manatutu, ne’ebé halibur membrus Governu, autoridade lokál sira, reprezentantes instituisaun Estadu nian, no komunidade lokál sira. 
Komemorasaun sira ne’e fó hanoin-hikas prosesu ne'ebé fó dalan ba povu timoroan atu ezerse sira-nia direitu ba autodeterminasaun liuhosi Konsulta Populár ne'ebé organiza hosi Nasoins Unidas iha loron 30 Agostu tinan 1999. Iha loron ne'e, 78,5% hosi votante sira rejeita proposta autonomia espesiál hamutuk ho Indonézia, hodi loke dalan ba restaurasaun independénsia Timor-Leste nian iha loron 20 Maiu tinan 2002.
Programa ne’e hahú iha loron 28 fulan-agostu ho atividade limpeza jerál ida iha Manatutu.
Iha loron 29, hala’o misa Agradesimentu ida iha Igreja Parokiál Santu António Manatutu, ne’ebé prezide husi Padre Mário Cabral, ho partisipasaun husi membrus governu, autoridade lokál sira, no reprezentantes hosi komunidade.
Hafoin selebrasaun relijioza ne’e, iha salaun “Ulfa Ikero” hala’o sesaun reflesaun nasionál ida kona-ba país nia perkursu istóriku no dezafiu sira iha futuru.
Ministru Prezidénsia Konsellu Ministrus, Agio Pereira, hato’o palestra ida ho títulu “Tinan 27: Dezenvolvimentu Konstrui Husi Kadesan”, iha ne’ebé nia ko’alia kona-ba prosesu ne’ebé lori ba Konsulta Populár, períodu Administrasaun Tranzitória Nasoins Unidas nian, no tinan dahuluk independénsia nian, nune’e mós prosesu estabilizasaun, konstrusaun Estadu, no dezenvolvimentu nasionál. Iha ninia diskursu, Ministru destaka 30 Agostu 1999 hanesan "ezemplu korajen ida hosi nasaun tomak".
Sesaun ne’e inklui mós intervensaun hosi Ministru Administrasaun Estatál, Tomás do Rosário Cabral kona-ba mandatu konstitusionál no prosesu dezenvolvimentu podér lokál iha munisípiu sira, no husi Diretór Ezekutivu Centro Nacional Chega!, Hugo Fernandes, kona-ba kontribuisaun istória no memória nian ba definisaun futuru nasaun nian.
Komemorasaun sira kontinua iha loron 30 Agostu ho marxa ida husi Ponte Manatutu to’o iha fatin selebrasaun, tuir fali ho konvíviu komunitáriu no atividade animasaun sira.
