Governu Timor-Leste

Prezidénsia Konsellu Ministrus

  Portavós Governu Timor-Leste

IX Governu Konstitusionál

...........................................................................................................................

Komunikadu Imprensa

Toleránsia Pontu iha loron 1 fulan-setembru durante loron tomak no iha parte loraik husi loron 10 fulan-setembru tinan 2026, iha okaziaun trasladasaun restus mortais hosi preladu katóliku sira ne'ebé hala'o knaar pastorál iha Timor-Leste

Hodi konsidera katak istória Timor-Leste nian mós, no labele haketak, istória ida fiar nian, rezisténsia espirituál no komuñaun entre povu ida no nia amlulik sira, no mós katak Igreja Katólika akompaña povu timoroan iha momentu nakukun liu iha sira-nia moris koletiva nian, iha ne’ebé preladu sira ne’ebé hala’o knaar pastorál iha rai ne’e husik hela legadu ida ne’ebé hakat liu tiha limites relijiozus nian, sai parte ne’ebé la bele haketak hosi identidade nasionál ne’e rasik;

Haree katak Dom Jaime Garcia Goulart, Dom José Joaquim Ribeiro no Monseñór Martinho da Costa Lopes hakoi iha Portugál, no katak Dom Alberto Ricardo da Silva hakoi iha semitériu Maloa-Ailok Laran, iha Dili;

Hodi konsidera katak, iha loron 1 fulan-setembru tinan ida-ne’e, preladu sira ne’ebé temi ona sira-nia restus mortais tuir planu sei to’o iha Timor-Leste, no Igreja Katólika, iha koordenasaun ho Governu, sei organiza serimónias relijiozas  hodi fó omenajen ba sira;

Konsidera katak, tuir alínea a) husi n. 2 artigu da-7 husi Lei n. 10/2005, loron 10 fulan-agostu, ne’ebé altera husi Lei n. 3/2016, loron 25 fulan-maiu, no 10/2023, loron 5 fulan-abríl, prevee katak bele fó toleránsia pontu ba okaziaun data komemorativu ofisiál;

Haree ba importánsia hosi faktu istóriku ne’e ba maioria populasaun nasionál ne’ebé fiar iha relijiaun katólika;

Hodi konsidera mós vontade Estadu no Governu Repúblika Demokrátika Timor-Leste nian atu simu ho onra boot tebes restus mortais hosi preladu sira ne’ebé temi ona iha loron 1 fulan-setembru tinan 2026;

Haree ba ne’e sei permite sarani katólika barak atu halo viajen ba Dili hodi partisipa iha eventu boot simu iha Aeroportu Internasionál Prezidente Nicolau Lobato restus mortais hosi Dom Jaime Garcia Goulart, Dom José Joaquim Ribeiro no Monseñór Martinho da Costa Lopes;

Hodi konsidera mós selebrasaun omenajen nian sira ne’ebé Igreja Katólika organiza iha loron 10 fulan-setembru iha Tasi Tolu, tuir fali ho ninia funeral iha Katedrál Dili;

Konsidera katak tuir dispostu iha alínea d) husi n. 6 artigu 7.º hosi Lei n. 10/2005, loron 10 fulan-agostu, ne’ebé altera husi Lei n. 3/2016, loron 25 fulan-maiu, no 10/2023, loron 5 fulan-abríl, kompeténsia Primeiru-Ministru nian hodi fó toleránsia pontu ba “funsionárius no ajentes ministériu ka servisu sira ne’ebé depende ba sira, nune’e mós institutu no organizmu sira ne’ebé integra iha administrasaun indireta Estadu nian”;

Nune’e, tuir dispostu iha alínea a) husi n. 2 no iha alínea d) husi n. 6 artigu 7.º husi Lei n. 10/2005, loron 10 fulan-agostu, ne’ebé altera husi Lei n. 3/2016, loron 25 fulan-maiu, no husi Lei n. 10/2023, loron 5 fulan-abríl, Primeiru-Ministru, liuhosi Despaxu n. 12/PM/VIII/2026, determina hanesan tuirmai:

1 - Fó toleránsia pontu iha loron sira tuirmai:

a)    Loron 1 fulan-setembru tinan 2026, loron tomak;

b)    Loron 10 fulan-setembru tinan 2026, hahú hosi tuku 12 meiudia.

2 - Despaxu ida-ne’e abranje ba funsionáriu, ajente no traballadór sira hotu ne’ebé hala’o atividade iha servisus administrasaun direta Estadu, tantu sentrál ka deskonsentradu sira, ka iha organizmu sira administrasaun indireta nian.

3 - La inklui iha númeru anteriór rekursus umanus hosi servisu públiku sira ne’ebé, tanba natureza hosi atividade ne’ebé sira hala’o, tenke hala’o nafatin serbisu durante períodu ne’e

4 - Sein prejuizu ba kontinuidade no kualidade servisu públiku nian ne’ebé atu halo, dirijentes másimus husi servisu sira ne’ebé maka temi ona iha númeru anteriór, tenke fó dispensa ne’ebé hanesan ba devér asiduidade funsionáriu sira ne’e nian, ne’ebé sei determina bazeia ba oportunidade. REMATA