Mensajen kondolénsia ba Luís Represas nia mate
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Loron 22 fulan-Jullu tinan 2026
Mensajen kondolénsia
ba Luís Represas nia mate
Ho laran-susar tebes mak ami rona notísia kona-ba Luís Represas nia mate, belun di’ak Timor-Leste nian.
Luís Represas dedika nia moris ba múzika no, iha dékada barak nia laran, hamosu kareira muzikál esepsionál ida ba ita.
Nia dalan moris kruza malu ho povu Timor nian liuhusi grupu múzika "Os Trovante". Iha tinan 1990, ho knananuk "Timor", kompostu husi João Monge no João Gil, Luís Represas fó lian ba sira ne'ebé labele fó sai ba mundu kona-ba atrosidade ne'ebé sira sofre durante okupasaun Indonézia.
Knananuk ne’e sai nu’udar símbolu ba povu Timor nia luta ba liberdade no autodeterminasaun hasoru injustisa ne’ebé sira hasoru.
Labarik no ema boot sira kanta múzika ne’e durante manifestasaun no vijília sira, hodi hatudu solidariedade ho povu Timor nia luta.
Iha loron 11 fulan-maiu tinan 2016, Luís Represas hetan kondekorasaun ho medalla Orden Timor-Leste.
Luís Represas kanta múzika "Timor" iha rai Timor ba dala ikus iha fulan-agostu 2019, durante selebrasaun ne'ebé marka aniversáriu ba dala 20 konsulta populár loron 30 fulan-agostu tinan 1999.
Iha kalan ne’ebá, nia hetan akompañamentu husi lian emosionál no livre husi Timoroan rihun ba rihun ne’ebé kanta hamutuk hodi fó onra ba labarik no belun sira hotu husi Timor-Leste.
Governu Timor-Leste hato’o nia tristeza ba Luís Represas nia mate no hato’o sentidu kondolénsia ba nia família no belun sira. REMATA
