Timor-Leste husu atu hakotu embargu ba Kuba no reafirma nia solidariedade ho povu kubanu
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Dili, loron 26 fulan-marsu tinan 2026
Komunikadu Imprensa
Timor-Leste husu atu hakotu embargu ba Kuba no reafirma nia solidariedade ho povu kubanu
Governu Timor-Leste hato’o ninia solidariedade ba povu no Governu Repúblika Kuba ne’ebé hasoru impaktu husi blokeiu ekonómiku, komersiál no finanseiru ne’ebé impoin husi Estadus Unidus Amérika, ne’ebé vigora husikedas dékada 1960 no sai todan liután iha tinan hirak ikus ne’e, ho efeitu ne’ebé makas liu iha tinan 2026.
Halo medidas restritivas sai forte liután, inklui aplikasaun sansaun extraterritorial no limitasaun ba fornesimentu kombustivel, kontribui ona ba krize multidimensional ida iha Cuba, ne’ebé marka ho dezafius iha setór enerjétiku, difikuldades iha funsionamentu ekonomia no falta sasán esensiál sira. Situasaun ida-ne’e afeta diretamente kondisaun moris populasaun nian, ho impaktu iha asesu ba ai-han no mós sasán no servisu esensiál sira seluk.
Iha kontestu ida-ne’e, Timor-Leste reafirma katak relasoins entre Estadu sira tenke bazeia ba diálogu, respeitu Direitu Internasionál no prinsípius ne’ebé konsagra ona iha Karta Nasoins Unidas nian, inklui direitu ba dezenvolvimentu no povu sira-nia moris-di’ak.
Apoiu no solidariedade Cuba nian mai Timor-Leste durante luta ba libertasaun nasionál sai baze ba relasaun kooperasaun ida ne’ebé mantein husikedas independénsia, liuliu iha formasaun ba médiku timoroan rihun resin iha Kuba no profisionál kubanu sira-nia prezensa nafatin iha país ne’e, iha área saúde no formasaun médika, nune’e mós iha programa sira iha área edukasaun no desportu. Governu Timor-Leste hato’o nia agradesimentu ba povu kubanu nia apoiu ne’ebé fó durante tinan naruk no reafirma ninia solidariedade iha situasaun daudaun ne’e.
Ministru Prezidénsia Konsellu Ministrus, Agio Pereira, afirma katak “Timor-Leste akompaña ho preokupasaun kona-ba situasaun ne’ebé povu kubanu hasoru no reafirma ninia pozisaun iha defeza ba solusaun sira ne’ebé bazeia ba diálogu no respeitu ba Direitu Internasionál”. REMATA
