Governu Timor-Leste

Hafoin hetan aprovasaun husi Konsellu Ministrus iha sorumutu estraordinária loron 30 fulan-setembru tinan 2025, no submisaun ba Parlamentu Nasionál iha loron 1 fulan-outubru tinan 2025, Proposta Lei Orsamentu Jerál Estadu (OGE) tinan 2026 nian tuirmai ba apresiasaun parlamentár, bazeia ba kalendáriu tuirmai:

● Loron 16 to’o 17 fulan-outubru: Semináriu Komisaun C kona-ba “Panorama Orsamentu tinan 2026”;

● Loron 17, 20 to’o 24 fulan-outubru: Audiénsias públikas;

● Loron 5 to’o 7 fulan-novembru: Debate no votasaun iha jeneralidade;

● Loron 13 to’o 26 fulan-novembru: Debate no votasaun iha espesialidade no votasaun finál globál;

● Hafoin votasaun final globál no redasaun final, Dekretu sei haruka ba Prezidente Repúblika atu promulga

Ho tema “Investe iha Transformasaun Nasionál, Integrasaun Rejionál no Dezenvolvimentu Inkluzivu”, proposta orsamentál, ho montante globál konsolidadu hamutuk dolar amerikanu biliaun 2,291, formula bazeia ba objetivus estratéjikus Governu Konstitusionál IX nian, ne’ebé ho objetivu atu:

● Promove dezenvolvimentu sosioekonómiku sustentável;

● Hasa’e investimentu iha infraestruturas estratéjikas;
● Hametin setór ekonómiku;

● Hadi'a sidadaun sira-nia moris-di'ak

OJE tinan 2026 reflete kompromisu Governu nian atu hasa’e kreximentu sustentável no inkluzivu, ne’ebé bele fó benefísiu ba sidadaun hotu-hotu Timor-Leste nian.