Primeiru-Ministru Kongratula Anthony Albanese ba Vitória Eleitorál
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Loron 5 fulan-maiu tinan 2025
Komunikadu Imprensa
Primeiru-Ministru Kongratula Anthony Albanese ba Vitória Eleitorál
Primeiru-Ministru Repúblika Demokrátika Timor-Leste, Kay Rala Xanana Gusmão, ohin, haruka mensajen ofisiál felisitasaun nian ida ba Primeiru-Ministru Commonwealth Austrália, Anthony Albanese, ba ninia vitória eleitorál no renovasaun mandatu nu’udar xefe Governu australianu.
Iha mensajen ne’ebé haruka ba, Xefe Governu destaka katak “rezultadu espresivu, ne’ebé lori fila-fali Partidu Traballista Australianu ba Governu ho maioria ne’ebé forsa liu tan, hanesan demonstrasaun klara ida husi konfiansa povu Austrália nian ba ninia lideransa no vizaun ba nasaun ida ne’ebé inkluzivu, justu no prósperu.”
Kay Rala Xanana Gusmão subliña tan katak, iha “tempu mudansa no instabilidade nian”, Primeiru-Ministru Albanese “fó ona sensasaun estabilidade no serteza ba Austrália”, no katak rezultadu eleitorál ne’e reprezenta mós “apoiu maka’as ba aproximasaun polítika esterna Austrália nian, inklui ninia kompromisu ba envolvimentu no kooperasaun rejionál ida ne’ebé pozitivu”.
Primeiru-Ministru valoriza fortalesimentu relasoins bilaterais entre Timor-Leste no Austrália iha lideransa Anthony Albanese nian, hodi subliña katak “relasoins bilaterais anteriór la forte liu hanesan daudaun ne’e” no afirma katak ninia “apoiu ba autodeterminasaun ba ita-nia povu durante ita-nia luta ba independénsia iha signifikadu boot tebes ba ita-nia nasaun”.
Hanoin hikas istória ne’ebé kompleksu kona-ba relasaun entre país rua ne’e, Xanana Gusmão afirma, nia fiar katak re-eleisaun ida-ne'e “reprezenta oportunidade ida ne’ebé únika hodi kria relasaun ne’ebé iha konfiansa, kooperasaun no solidariedade.”
Karta ne’e destaka mós importánsia desiziva ba dezenvolvimentu Projetu Greater Sunrise ba futuru Timor-Leste nian, ne’ebé “sei sai hanesan baze ba dezenvolvimentu sosiál no ekonómiku iha tempu naruk”. Xefe Governu ne’e fó hanoin kona-ba Deklarasaun Konjunta foin lalais ne’e, tuir serbisu exelente hosi Ministra Negósius Estranjeirus Austrália nian, Penny Wong, no Enviadu Espesiál Steve Bracks, ne’ebé espresa konfiansa atu “kontinua dezenvolve progresu ida-ne’e ba benefísiu mútuu nasaun rua ne’e nian”.
Primeiru-Ministru mós aproveita hodi afirma fali konvite ba nia omólogu australianu atu vizita Timor-Leste, no subliña katak vizita ofisiál ida “sei simu ho di’ak tebes hosi povu Timor-Leste no sei hametin liután ita-nia relasaun amizade ne’ebé forte”.
Iha komunikadu ne’ebé fó sai horisehik, loron 4 fulan-maiu, Governu felisita Anthony Albanese ba ninia re-eleisaun no Ministru Prezidénsia Konsellu Ministrus, Portavós Governu no interlokutór Timor-Leste iha negosiasaun kona-ba Projetu Greater Sunrise, Agio Pereira, hateten katak “Governu Timor-Leste hein atu kontinua serbisu ho kolaborasaun ne’ebé metin ho Primeiru-Ministru Albanese no ho ninia administrasaun atu avansa ita-nia objetivu komún sira no aprofunda liután ita-nia relasaun bilaterál”. REMATA
