Governu Timor-Leste

Sekretaria Estadu husi Arte no Kultura no Ministériu Turizmu sei halo lansamentu ba projetu “Protesaun no Promosaun husi Arte Rupestre iha distritu Lautém”, iha loron 1 Maio, tuku oras 9 dadersan, iha vila Tutuala.

Projetu ne'e, ho finansiamentu husi UNESCO, liu husi mekanizmu Funds in Trust husi Governu Olanda, mai husi servisu hamutuk husi Governu Timor-Leste, UNESCO, ONG Many Hands International no komunidade husi Tutuala.

Sei iha oportunidade hodi haree espozisaun rua kona ba arte rupestre iha Tutuala (ida iha vila Tutuala no ida iha Lospalos), no mos hodi vizita gruta ida iha rejiaun ne'ebé iha pintura rupestre, ne'ebé hetan prosesu sai muzeu hamutuk ho komunidade lokál.

Hahú iha 2002, liu tinan sanulu ona, investigadór sira husi Universidade Nasionál Austrália, hamutuk ho Governu Timor-Leste, hala'o investigasaun arkeolojia iha distritu Lautém. Agora dadaun ita hatene ona fatin arkeolojia liu atus iha rejiaun ne'e, iha Parke Nasionãl Nino Konis Santana nia laran, no husi ne'e fatin barak iha arte rupestre.

Iha fatin barak ne'ebé iha arte rupestre iha Tutuala, komunidade lokál sei hala'o prátika tradisionál sira no iha signifikadu ne'ebé uniku iha rejiaun no iha mundu. Liu husi prosesu konsulta komunitária no jestaun di'ak entre Governu no komunidades sira, fatin balu bele hola parte iha lista Patrimóniu Mundiál husi UNESCO no uza hodi apoiu atu harii ekonomia sustentável kona ba turizmu kulturál.

Lansamentu husi projetu ne'e hanesan marku importante kona ba servisu hamutuk ne'ebé hala'o iha tinan hirak liu ba, entre Governu, UNESCO no komunidade sira husi Tutuala, hodi fo protesaun no promosaun husi patrimóniu kulturál husi Timor-Leste, liu liu arte rupestre iha distritu Lautém.