Sekretáriu Estadu Terras no Proprioridade husu ba komunidade sira atu mantein nafatin baliza ne’ebé maka uluk iha tiha ona, no lalika preukupa ho baliza administrativa, liuliu iha fronteira, hanesan baliza nasaun nian. Jaime Xavier Lopes husu ida-ne’e banihira halo sensabilizasaun kona-ba lei ba rai iha sub-distritu Pasabe, distritu Oe-Cusse Ambeno, iha loron 26 Marsu 2014.
Nia esplika, problema baliza administrativa dala ruma mosu tanba komunidade sira hosi suku A bá hela iha suku B, ka halo to’os ruma iha suku B nia laran. “Bainhira iha problema, hanesan komunidade hosi suku A maibé nia muda ba hela iha suku B, nia tenki submete ba iha suku B, la’ós lori fali suku A tama iha suku B”, Sekretáriu Estadu esplika.
Iha biban ne’e, Domingos Mala, nu’udár Xefé suku mós husu, karik sertifikadu uluk nian sei vale kalae no rai abandonadu ne’ebé na’in hosik hela, sira sei iha direitu ba rai ne’ebé sira hosik hela kalae. Hatan ba komunidade sira-nia prekupasaun, kona-ba sertifikadu Governu portugés ho Governu indonezia, Sekretáriu Estadu informa komunidade katak sira ne’ebé iha sertifikadu portugés no indonesia nian, atu rai hela hodi sai baze legal ida futuru, katak rai ne’e pertensia ba komunidade sira nian duni.
Hanesan mós José António Soares, membru komunidade, husu ba Terras no Propriedade atu halo notifikasaun ba ema estranjeiru ne’ebé mai fa’an fali rai iha Timor-Leste, inklui mós notifika ema ne’ebé maka sosa rai privadu abandonadu.
Hanesan sensabilizasaun ne’ebé uluk iha sub-distritu Oe-Silo, iha loron 25 Marsu 2014, kona-bá fa’an rai ba ema estranjeiru, Sekretariu Estadu informa katak tuir artigu 54 Konstituisaun RDTL alinea haat hateten, “Ema sidadaun nasionál de’it maka bele iha direitu ba propriedade privada sidadaun nian”.
“Fa’an rai hanesan mós fa’an oan sira nia futuru. Fa’an rai sei halo di’ak ba ema ne’ebé maka sosa no ida ne’ebé fa’an ikus mai sei arepende”, Jaime Xavier Lopes hateten.
Administradór sub-distritu Oe-Silo, Alberto Punef, kontente ho prezensa membru Governu tanba bele esplika kona-ba lei rai hodi aumenta komunidade sira-nia kuñesimentu kona-ba diretu no dever ba rai.