Sekretaria Estadu Apoiu Promosaun Setór Privadu (SEAPRI), loron sesta 28 fulan Marsu, asina protokolu hodi transfere osan dolar amerikanu milaun 10 ba iha Banku Nasionál Komérsiu Timor-Leste (BNCTL), atu fasilita kréditu no reforsa kapasidade finanseiru emprezáriu timoroan sira.

Sekretária Estadu Apoiu Promosaun Setór Privadu, Veneranda Lemos, iha ninia diskursu hateten, “protokolu entre SEAPRI ho BNCTL importante, atu asegura Ministériu Finansa transfere osan miliaun 10 ne’e”.

Hau hanoin liuhusi osan dólar millaun 10 ne’e, BNCTL bele atende di’ak liu tan ita-nia emprezáriu no ba públiku hala’o atividade ekonómiku ho di’ak, hodi fortifika ita-nia ekonomia iha rai ida-ne’e,” Veneranda hateten.

Iha oportunidade ida ne’e, Vise Prezidente CCI-TL, Kathleen Gonçalves informa, durante ne’e setór privadu iha Timor-Leste susar atu asesu ba kréditu. “Orsamentu ba kréditu ne’e, bele ajuda ona emprezáriu Timor-oan sira hodi halo investimentu”, nia dehan tan.

Prezidente Konsellu Administrasaun BNCTL, Brigido de Sousa, hateten, tinan ida-ne’e Governu iha ona kompromisu boot aloka kapital adisionál dólar millaun 10 atu hakbiit kapasidade finanseiru BNCTL nian atu fó kréditu barak liu tan ba iha setór privadu.

Durante ne’e, BNCTL la’os deit fó kréditu ba funsionáriu públiku, maibé fo kréditu mós ba setór privadu sira atu halo atividade komersiál. Montante kréditu ne’ebé mak BNCTL fo ba kliente sira komesa husi $200 to dólar amerikanu rihun $100.