Toleránsia pontu iha loron 17 fulan Abril tinan 2014, husi parte loro-kraik nian no loron 21 fulan Abril, durante loron tomak
Prezidénsia Konsellu Ministrus
V Governu Konstitusionál
..............................................................................................................................
Díli, Loron 15 Fulan Abril Tinan 2014
Komunikadu Imprensa
Toleránsia pontu iha loron 17 fulan Abril tinan 2014, husi parte loro-kraik nian no loron 21 fulan Abril, durante loron tomak
V Governu Konstitusionál Timor-Leste nian diside ona fó toleránsia pontu iha loron 17 fulan Abril 2014, husi parte loro-kraik nian, hahú hosi oras tuku rua loro-kraik, no loron 21 fulan Abril 2014, durante loron tomak, ba funsionáriu no ajente ministériu sira ka servisu ne’ebé sira depende ba, nune’e mós institutu no organizmu ne’ebé tama iha administrasaun indireta Estadu nian.
Desizaun ida-ne’e bazeia ba Lei nº 10/2005 loron 10 fulan Agostu nian, ne’ebé determina loron feriadu nasionál, data ofisiál komemorativa no toleránsia pontu. Entre data ofisiál komemorativa hirak ne’e, Kinta-feira Sanda mak iha tinan-tinan la monu iha loron hanesan.
Kinta-Feira Santa, tinan ida-ne’e sei selebra iha loron 17 fulan Abril, loron ikus kuarezma nian iha kalendáriu relijiaun katólika nian, no loron ne’e nu’udar loron boot no importante tebes-tebes ba komunidade Kristaun Timor-Leste nian. Ho faktu ida-ne’e Governu hola desizaun fó toleránsia pontu, hahú hosi oras tuku rua loro-kraik.
Iha loron 21 fulan Abril, fó toleránsia pontu durante loron tomak hodi ida-idak fila ba nia uma, hafoin selebrasaun Domingu Páskoa nian hamutuk ho família sira iha distritu.
