Sekretaria Estadu Polítika Formasaun, Profisionál no Empregu (SEPFOPE), durante loron 3 hahú 26-28, Marsu 2014, realiza formasaun prátika jornalizmu ba ofisiál komunikasaun sosiál ne’ebé servisu iha SEPFOPE iha edifisiu Obrigado barak, Kaikoli, Díli. Matéria formasaun kompostu husi hakerek notisia, komunikadu Imprensa, features (karakterístika) no Fotográfia.

Sekretáriu Estadu Komunikasaun Sosiál, Nélio Isaac Sarmento, iha abertura ba formasaun hateten, SEPFOPE hahú ona prepara kapasidade rekursu umanu kona-ba oinsá prepara informasaun atu divulga ba públiku, liuhusi meius Komunikasaun Sosiál.

Sekretáriu Estadu ba Formasaun Profesionál no Empregu, Ilídio Ximenes da Costa, hateten, formasaun ida-ne’e atu lori funsiunariu sira mai halo prátika no treinu, oinsá ligasaun ho média sira.

“Ita tuir formasaun prátika jornalizmu, la’os ita atu troka jornalista hot-hotu iha timor laran. Treinu ne’e atu fasilita prepara diseminasaun informasaun ho grarantia kualidade informasaun interna, molok entrega ba jornalista sira”, Ilídio Ximenes da Costa haktuir.

“Disemina informasaun importante tebtébes. Formasaun ne’e fokus uluk ba sira ne’ebé iha diresaun idak-idak, atu bele hakerek sira-ninia relatóriu no rekolla dadus,” nia hateten tan.