Sekretária Estadu Arte no Kultura, Maria Isabel Ximenes, lansa livru ho títulu “Patrimóniu Arkitetónika ho Orijen Portugeza hosi Likisá”, lansamentu ne’e hala’o iha loron 28 fulan Marsu 2014, iha distritu Liquiçá.
Maria Isabel Ximenes, hateten katak, sei lansa livru ida kona-ba matéria ida ne’e iha distritu hotu-hotu. Publikasaun ida ne’e iha ho objetivu la’os de’it atu fó koñese patrimóniu kulturál nasaun nian, maibé mós atu kontribui ba ninia prezervasaun no protesaun. Ho razaun ida ne’e, iha pájina ikus liu publika rezolusaun Governu no 25/2011 kona-ba protesaun Patrimóniu Kulturál, ne’ebé aprova iha fulan Setembru 2011.
Sekretaria Estadu Arte no Kutura (SEAK) iha planu hanesan sei lansa tán livru ida kona-ba distritu Oe-cusse Ambeno iha tinan 2015 – Selebrasaun tinan 500 portugés sira tama mai iha Timor, ne’ebé akontese iha Lifau (Oecusse-Ambeno). “Ami hala’o hela levantamentu informasaun hosi distritu ba distritu no publika informasuan sira ne’e. Livru kona-ba patrimóniu Liquiçá nian ne’e, hanesan rezultadu dahuluk hosi levantamentu refere”, tenik Sekretária Estadu.
Iha Fulan Fevereiru tinan ne’e nian, hala’o mós lansamentu ba livru seluk ida ho títulu “Patrimóniu Moris Komunidade Sira-nian iha Timor-Leste”, ne’ebé iha kooperasaun ho UNESCO. Livru ida ne’e la kleur tán, sei fahe ba Ministériu sira hotu, Parlamentu Nasionál no mós ba autoridade lokál sira, ho objetivu jerál atu fanun fila-fali interese kona-ba patrimóniu sira ne’ebé eziste iha nasaun ida ne’e, no insentiva distritu idaidak atu mantein nafatin ninia kultura no identidade rasik. Kompete ba SEAK prezerva no proteje kultura timor nian no hametin nafatin relasaun ho komunidade sira”, hateten Maria Isabel Ximenes.
Tuir Diretór Nasionál Patrimóniu Kulturál, Manuel Smith, iha planu hanesan mós atu halo levantementu ba dadus sira seluk iha distritu Liquiça, inklui mós aspetu sira ne’ebé relasiona ho patrimóniu tradisionál no uma lulik sira.
Kona-ba patrimóniu ho orijen portugeza, “embroa seidauk rekolla hotu dadus sira ne’ebé eziste iha nasaun ne’e, maibé livru ida ne’e iha ona amostra ida ne’ebé di’ak hosi patrimóniu sira ne’ebé eziste iha distritu seluk”, konklui Manuel Smith. Livru ida ne’e fó atensaun espesiál ida ba patrimóniu kulturál ne’ebé eziste iha Dili, iha ne’ebé verifika ona dezenvolvimentu ida ne’ebé forte hosi infraestrutura sira, atu bele identifika antes patrimóniu sira, nune’e evita labele lakon.
Marka prezensa iha serimónia ne’e Sekretária Estadu Terras no Propriedades, Reprezentante hosi Embaixada Japaun nian, Reprezentante hosi Ministériu Negósiu Estranjeiru no Kooperasaun, Diretór Nasionál no xefe departamentu sira, Administradór distritu Dili no Autoridade lokál sira.