Timor-Leste felisita Sir Peter Cosgrove tanba ninia nomeasaun nu’udar Governadór-Jerál Austrália nian
Ministru Estadu no Prezidénsia Konsellu Ministru no
Porta-Vóz Ofisiál Governu Timor-Leste
Díli, loron 1 fulan Abril tinan 2014
Timor-Leste felisita Sir Peter Cosgrove tanba ninia nomeasaun nu’udar Governadór-Jerál Austrália nian
Governu Timor-Leste felisita Sir Peter Cosgrove tanba, iha semana kotuk, hetan nomeasaun hanesan Governadór-Jerál Austrália nian.
Iha 1999, Majór-Jenerál Peter Cosgrove hetan nomeasaun hanesan Komandante Misaun Internasionál Manutensaun Paz nian, INTERFET. Iha funsaun ida ne’e, nia kaer knaar ida signifikativu kona-ba estabilizasaun Timor-Leste nian, hahú kedas hosi ninia nomeasaun, iha fulan Setembru tinan 1999, to’o remata misaun INTERFET nian iha loron 28 fulan Fevereiru tinan 2000.
Majór-Jenerál Cosgrove, ne’ebé koñesidu iha tempu nebá ho naran ida ne’e, liga malu di’ak ho líder Timor-oan sira. Nia haburas relasaun ida dura duni ho líder Rezisténsia nian, Primeiru-Ministru Kay Rala Xanana Gusmão, no nia mós iha relasaun di’ak tebes ho ema hotu ne’ebé hadulas nia.
Primeiru-Ministru Xanana Gusmão koalia: “respeitu ne’ebé mak Peter ho ha’u hato’o ba malu ne’e, nu’udar fó respeitu ba malu. Ami na’in rua iha momentu nebá nu’udar komandante militár de’it no nia hatene momós kona-ba ita nia luta tinan 24 nia laran no nia servisu hamutuk ho ita, iha tempu difísil nia laran atu lori páz no dignidade mai ita rain”.
Iha loron ne’ebé Majór-Jenerál Cosgrove husik hela Dili, iha fulan Setembru tinan 2000, nia simu prezente roupa uniforme Komandante-em-Xefe FALINTIL nian, hosi Xanana, hanesan sinál respeitu no gratidaun nian.
Peter Cosgrove fila hikas mai Dili, iha tinan 2009, bainhira atu simu Kolár Orden Timor-Leste nian ne’ebé hato’o hosi Prezidente José Ramos-Horta, iha aniversáriu ba da-10 Konsulta Populár, ne’ebé hala’o iha Palásiu Prezidensiál.
Foin dadauk ne’e, iha karta felisitasaun nian ida ne’ebé haruka ba iha Peter Cosgrove, Primeiru-Ministru Xanana Gusmão hakerek “tanba Ita Boot nia servisu kleur iha ami nia Nasaun, tanba Ita Boot nia konkista barak no ba Ita Boot nia laran luak, ha’u hatene katak Ita Boot sei hala’o knaar foun ne’e ho dignidade no susesu. Austrália iha sorte di’ak ida, hodi hetan ema ida ne’ebé ho esperiénsia no laran luak hanesa ninia Governadór-Jerál ida ne’e”.
Hodi Governu no Povu nia naran, Primeiru-Ministru hato’o konvite ida ba Sir Peter Cosgrove atu fila mai vizita tasi-ibun Timor-Leste nian sira, iha biban ida ne’e nia hetan knaar foun hanesan Governadór-Jerál Austrália nian.
