Governu Timor-Leste

Ministériu Negósiu Estranjeiru no Kooperasaun Timor-Leste, organiza enkontru kooperasaun entre Timor-Leste no Repúblika Indonézia, 7 Marsu 2014 iha Dili, Timor-Leste.

Sorumutu ne’e nia objetivu atu haree fila-fali kooperasaun tékniku entre  Repúblika Indonézia ho Timor-Leste no follow-up rezultadu enkontru entre Prezidente Repúblika, Taur Matan Ruak ho Prezidente Repúblika Indonézia, Soesilo Bambang Yudhoyono,  iha Jakarta tinan kotuk, ne’ebé Iha enkontru ne’eba, Prezidente Repúblika Indonésia promete atu aumenta kooperasaun téknika ho Timor-Leste.

Diretór-Jerál Relasaun Externa, João Freitas Câmara, informa, Indonézia oferese fundus osan dolár amerikanu millaun neen, atu kobre área Saúde, Ambiente, Industria, Agrikultura, Seguransa, Defeza, no mós hodi prepara kapasitasaun ba timoroan sira, ne’ebé servisu hanesan funsionáriu públiku, inklui  bolsa estudu ba órgaun otonómia sira husi Universidade.

Iha parte seluk, Embaixadór Indonézia iha Timor-Leste, Primanto Hendrasmoro, hateten, sorumutu ne’e hanesan kontinuasaun servisu hamutuk liuhosi kooperasaun téknika, ne’ebé durante ne’e hala’o ona. “Halo evaluasaun, atu nune’e kooperasaun ba oin bele fó benefisiu konstrutivu ba dezenvolvimentu Timor-Leste. Tanba Governu Indonézia hakarak kontinua servisu hamutuk liuhosi kooperasaun téknika ba setór hotu-hotu,” Primanto Hendrasmoro hateten.

Dezde 2009 to’o 2013, Indonezia no Timor-Leste halo ona koperasaun iha programa 122 ho nia benefisiariu sira ema na’in 1.811, husi área setór Saúde, Ambiente, Indústria, Agrikultura, Seguransa, Defeza, Edukasaun, Bolsa Estudu no Treinamentu.

Marka mós prezensa iha enkontru bilaterál ne’e, Diretór-Jerál, Diretór Nasionál hosi Ministériu no Sekretária Estadu sira hotu.