Parlamentu Nasionál aprova Lei Imprensa ne’ebé diskute ona iha loron 11 fulan-Marsu iha jeneralidade. Hafoin hetan tiha aprovasaun iha Sorumutuk Konsellu Ministrus iha loron 6 fulan-Agostu tinan 2013, Projetu Lei ne’e, tuirmai submete ba diskusaun iha Parlamentu Nasionál, hetan votasaun iha jeneralidade ho votu afavór hamutuk 49, abstensaun votu 1 no laiha ema-ida maka fó votu kontra.
Sekretáriu Estadu Komunikasaun Sosiál, Nélio Isaac Sarmento, haksolok ho rezultadu ne’e: “Lei Imprensa hetan aprovasaun iha jeneralidade hosi partidu hotu-hotu no laiha ema-ida maka fó votu kontra no votu abstensaun ida de’it, nu’udar rezultadu ida pozitivu tebetebes hafoin tinan barak nia laran (tinan 2007 – 2013) harii asosiasaun jornalista sira nian no ninia esbosu lei”.
Nélio Isaac Sarmento fó-hanoin, tan katak, “Timor-Leste ne’e nasaun demokrátika ida no iha ninia Konstituisaun artigu 40u no 41 ne’ebé define liberdade espresaun no informasaun no liberdade imprensa no meiu komunikasaun sosiál nian. Ho lei ne’e Governu hakarak asegura direitu sira ne’e no proteje nia hosi interferénsia podér polítiku ka ekonómika nian”.
Lei imprensa sei sai nafatin alvu ba diskusaun espesialidade ba-iha Parlamentu Nasionál.