Ministériu Finansas hala’o semináriu ho nia tema “Disiminasaun Regras no Prosedementu Ba ezekusaun Orsamentu Jerál Estadu tinan 2014”, simináriu ne’e hala’o ba Diretór Jerál, Diretór Finansas no pontu fokál hosi kada Ministériu no Sekretária Estadu sira, iha loron kinta, 13, fulan Fevereiru, tinan 2014, iha Sentru Konvensaun Díli.

Tuir Vise Ministra Finansas, Santina Cardoso katak, hafoin aprovasaun Orsamentu Jerál Estadu (OJE) depois promulgasaun hosi Presidente Repúblika, Ministériu Finansas sempre hala’o enkontru ho Diretór Jerál, Diretór Nasionál Finansas ho pontu fokál hosi Ministériu no Sekretária sira ho objetivu disimina kona-ba regras no prosedementu ezekusaun orsamentu nian. Oportunidade ida ne’e mós  bele fó disiminsaun informasaun tomak koná-ba sistema, planeamentu, orsamentu rasik no mós kona-ba lalaok ezekusaun iha tezouru, nune’e Ministériu sira hotu bele lao tuir regras ne’ebé mak iha.

Iha fatin hanesan, Vise Primeiru-Ministru, Fernando La Sama de Araújo mós husu ba Diretór Jerál, Diretór Nasionál atu servisu didi’ak ajuda malu no tau matan ba funsionáriu ida-idak, nune’e servisu administrasaun bele lao ho di’ak no fasíl. Hateten mós kuandu Diretóres Administrasaun Públika la asumi responsabilidade ho di’ak, la aprende barak mak nasaun sei hasoru problema, tanba ne’e, husu ba imi Diretor Jerál, Diretór Nasionál no Funsionáriu sira ha’u nia konfiansa boot ba imi tenki aprende barak, kuandu la hatene tenki konsulta tanba ezekusaun loloos ne’e iha imi la’ós membru Governu sira.

Nia mós hatutan katak, husu ba diretór sira atu servisu didi’ak tanba ezekusaun orsamentu loloos ne’e iha administrasaun públika, ita hanesan nasaun foun labele monu ba ambitu mal prátika, kuandu ita toman tiha ona abut tuun tiha ona ba rai ita fokit mós susar, tanba ne’e, ita servisu tenki tuir Lei, tanba ita tenki kumpri Lei ne’e mak kesi, fasilita no orienta ita nia servisu iha sistema administrasaun nia laran, hateten Fernando La Sama de Araújo.