Komisaun Nasionál ba Implementasaun medida sira kona-ba Kombate ba Brankeamentu Kapitál no Finansiamentu Terrorizmu (CNCBC) harii liuhusi Rezolusaun Konsellu Ministru nian ne’ebé hetan aprovasaun iha loron 3 fulan Fevereiru tinan ida ne’e nian.

Objetivu ida husi Komisaun ne’e mak asegura no promove implementasaun medida hirak ne’ebé Grupu Ázia-Pasífiku (APG) ba luta kontra Brankeamentu Kapitál no Finansiamentu Terrorizmu rekomenda, ne’ebé Timor-Leste mós sai ona hanesan ninia membru husikedas fulan Jullu tinan 2008.

Sorumutu dahuluk CNCBC nian hala’o iha loron 4 fulan Marsu, iha sala VIP Ministériu Negósiu Estranjeiru no Kooperasaun nian, no prezide hamutuk husi Ministru Negósiu Estranjeiru no Kooperasaun, José Luís Guterres, no husi Ministru Justisa, Dionísio Babo Soares, no konta mós ho prezensa husi Governadór Banku Sentrál, Abrão Vasconcelhos, nune’e mós ho reprezentante sira husi Prokuradoria-Jerál Reúblika, Polísia Nasionál Timor-Leste no Diresaun Nasionál Alfándega Ministériu Finansa ninian.

Husi sorumutuk ida ne’e maka halo ona aprovasaunida ba regulamentu CNCBC nian, nun’e mós ho kriasaun Grupu Traballu atu hala’o knaar iha reforma lejizlativa hirak ne’ebé presiza hodi luta kontra fenómenu ida ne’e. Grupu Traballu ne’e, ne’ebé harii iha ámbitu kompeténsia sira CNCBC nian, sei kompostu husi ekipa Jurista husi Ministériu Justisa no husi Ministériu Negósiu Estranjeiru no Kooperasaun, no mós husi tékniku sira husi Prokuradoria-Jerál Repúblika no Banku Sentrál.

Tema seluk ne’ebé ko’alia mós iha sorumutu ne’e mak konferénsia internasionál ba luta kontra brankeamentu kapitál no finansiamentu terrorizmu, ne’ebé tau ona hanesan ajenda ba loron 10 to’o loron 14 fulan Marsu. Konferénsia ida ne’e sei konta ho partisipasaun husi peritu sira husi China (Macau), Singapura no Malásia, nune’e mós husi grupu APG nian, husi Fundasaun Internasionál Kontra Brankeamentu Kapitál no Finansiamentu Terrorizmu (FATF) no husi instituisaun finanseira sira.

Liuhusi semináriu ne’e, hakarak atu, halo avaliasaun ba posibilidade sira atu reforsa norma jurídika sira iha Kombate ba Brankeamentu Kapitál no ba Finansiamentu Terrorizmu iha nível internu, no hadi’a mós koordenasaun ho esteriór, liuliu ho APG no FATF, atubele kumpre norma internasionál sira kona-ba krime hirak ne’e.