Sekretaria Estadu Komunikasaun Sosiál (SEKOMS) no Lembaga Pers Dr. Soetomo (LPDS) hala’o kooperasaun iha área jornalizmu, hodi kapasita jornalista Timor-Leste.

Kooperasaun ne’e hala’o liu hosi serimónia asinatura nota entedimentu entre Sekretáriu Estadu Komunikasaun Sosiál, Nélio Isaac Sarmento no Presidente Lembaga Pers Dr. Soetomo (LPDS), Bambang Harymurti, iha Jakarta, Indonézia, loron 24, Fulan Fevereiru, tinan 2014.

“Governu Timor-Leste konsidera katak, fatór determinante ida iha desenvolvimentu média inkluzivamente área jornalizmu mak kapasitasaun rekursus humanus”, dehan Sekretáriu Estadu Komunikasaun Sosiál.

Nélio Isaac Sarmento subliña Governu Timor-Leste hakarak dezenvolve média iha aspetu hotu atu kontinua fasilita informasaun ho kualidade ba populasaun hodi partisipa ativu iha prosesu desenvolvimentu nasionál, halo kontrolu sosiál no kontribui ba koezaun sosiál.

Sekretáriu Estadu fiar katak halo kooperasaun ho Lembaga Pers Dr. Soetomo (LPDS) nian bele apoiu planu Governu Timor-Leste iha setór Komunikasaun Sosiál no bele hametin liu tán relasaun entre instituisaun no autór média sira inklui povu ein jerál entre nasaun rua.

Presidente LPDS, Bambang Harymurti hateten, LPDS sei esforsu atu kontribui liu husi formasaun ne’ebé sira oferese ho kualidade no reflete nesesidade atuál Média Timor-Leste ninian.

Bambang Harymurti haktuir tán katak, LPDS iha rekursu humanus no fasilidade nato’on inklui esperiensia formasaun hodi ezekuta objetivu nota entendimentu ne’e.

Nota entendimentu ho durasaun tinan ida no renovavél,  kobre formasaun ba jurnalista Timor-Leste iha área jurnalizmu eletróniku, Imprensa no online ho kuríkulu formasaun bazeia ba nesesidade atuál formasaun jornalista sira.

Formasaun ba jornalista sei hala’o iha Jakarta no Díli, no sei utiliza fundu Dezenvolvimentu Kapitál Humanu nian ne’ebé Governu aloka iha Orsamentu Jerál Estadu ba tinan 2014.