………………………………………………………………………………………………………………
Díli, Loron 18 Fulan Fevereiru Tinan 2014
Komunikadu Imprensa
Sorumutu Konsellu Ministru loron 18 fulan Fevereiru tinan 2014
Governu hala’o sorumutuk iha Tersa ne’e, loron 18 fulan Fevereiru tinan 2014, iha sala sorumutuk Konsellu Ministru nian, iha Palásiu Governu, iha Dili no aprova ona:
1. Rezolusaun Governu nian ne’ebé aprova kriasaun Komisaun Preparasaun Simeira CPLP (sigla iha lian Portugés) nian
Ho Simeira Komunidade Nasaun Lian Portugés sira CPLP ne’ebé besik daudaun ona, ne’ebé sei hala’o iha Dili, iha fulan Jullu, hodi loke Prezidénsia bienál, (tinan rua dala ida), 2014-2016 Timor-Leste nian ba dahuluk iha organizasaun internasionál ida ne’e, Governu hakotu hodi harii Komisaun Preparasaun Simeira CPLP nian, ne’ebé Francisco Guterres Lu-OLo maka sei prezide.
Misaun boot Komisaun ne’e nian maka propoin no organiza asuntu hirak ne’ebé atu dezenvolve durante enkontru iha fulan-Jullu ne’e, no hodi reflete sa’ida maka tenke hala’o durante tinan rua oin mai. Buat ne’ebé komisaun ne’e hakarak halo maka, husi sorin ida, hatene loloos kona-ba klareza no efikásia no rezultadusira husi programa hirak ne’ebé hala’o tiha ona to’o oras ne’e iha nasaun benefisiáriu ida-idak iha kontestu kooperasaun bi ka multilaterál hirak ne’ebé asina tiha ona, no, husi sorin seluk, orienta tuir programa, nasaun membru ualu ne’e ba fin ida ne’ebé komún, liuliu ba setór ekonómiku, ne’ebé sei haree liu ba oinsá hamenus diferensa sósio-polítiku-ekonómika sira entre nasaun sira membru CPLP nian.
Tanba aprovasaun Orsamentu Jerál Estadu nian ba 2014 ne’ebé atraza, pratikamente, Komisaun ne’e sei iha fulan haat atu halo planu no prepara Simeira, ne’ebé tenke hala’o husi loron 20 to’o fulan 25 fulan Jullu tinan ida ne’e nian.
2. Proposta Lei kona-ba Organziasun Investigasaun Kriminál
Diploma ida ne’e estabelese regra sira organizasaun nian no kompeténsia ba investigasaun kriminál ba órgaun polísia kriminál barak-barak ne’ebé halo atuasaun iha adminsitrasaun justisa nian, ho objetivu prinsipál sira maka atu garante estabilidade funsionál husi investigasaun kriminál, klarifika, rasionaliza no operasionaliza organizasaun investigasaun kriminál, determina limitasaun kona-ba autonomia téknika no tátika polísia sira nian no fahe kompeténsia entre órgaun polísia kriminál oin-oin, nune’e mós atu kria mekanizmu koordenasaun estratéjika no operasionál ida kona-ba investigasaun kriminál, iha sira nia nível irarkia nian oinoin.
3. Dekretu-Lei ne’ebé aprova Orgánika Polísia Sientífika Investigasaun Kriminál nian
Dekretu Lei ida ne’e prevee kriasaun Polísia Sientífika Investigasaun Kriminál nu’udar korpu superiór polísia nian ida ne’ebé independente, tuir orgánika depende ba Ministériu Justisa no funsionalmente ba Ministériu Públiku, ne’ebé fiskaliza, hetan mós autonomia téknika no tátika bainhira hala’o investigasaun kriminál sira, hodi fó tulun ba autoridade judisiál sira.
Kriasaun Polísia Sientífika Investigasaun Kriminál nian sei loke dalan ba investigasaun kriminál nian ida ne’ebé funsiona ho lalais no efikás liután, no husi ne’e sei rezulta administrasaun no aplikasaun justisa nian ne’ebé di’ak liu no, nune’e bele hetan sentimentu konfiansa nian ida ne’ebé boot liután husi sidadaun sira.