Ministru Estadu no Prezidénsia Konsellu Ministru no

  Porta-Vóz Ofisiál Governu Timor-Leste

Díli, Loron 20 fulan Fevereiru tinan 2014

Timor-Leste hetan reprezentasaun ba dahuluk iha Jogu Olímpiku sira Invernu nian

Iha Sábadu ida ne’e, bainhira Yohan Gonçalves tun, ho velosidade aas, husi foho ida ne’ebé neve taka metin, iha slalom mane nian, iha Sochi, sei hakerek iha livru rekorde nian nu’udar atleta timoroan dahuluk ne’ebé kompete iha Jogu Olímpiku Invernu nian sira.

Yohan, iha otas 19, moris iha Fransa. Nia aman ema Fransés no nia inan ema timoroan no hahú halimar eskí sei ki’ik kedas. Ninia hakarak atu reprezenta Timor-Leste iha Jogu Olímpiku nian mós iha kedas ona husi tempu nia sei ki’ik. Nia fó ninia vontade ne’e ba nia inan tanba tau ona ba nia neon, domin ba kultura Timor nian, no tanba vizita beibeik ninia família no belun sira iha Timor-Leste, bainhira la hala’o treinu iha parte seluk mundu nian, ne’ebé malirin liu.

Iha loron 7 fulan Fevereiru, Yohan ho orgullu lori bandeira Timor-Leste nian ba Estádiu Olímpiku Sochi nia, iha Rúsia, no kumpri ona ninia mehi boot ida entre nia mehi boot hirak seluk. Bainhira nia halo ida ne’e, nia dada mós interese mundu nian ba ninia inan nia rain moris fatin.

Primeiru-Ministru hakerek karta ida ba Gonçalves Goutt, atu dezeja boasorte ba nia iha loron-Sabádu, hodi dehan “ninia determinasaun boot atu hetan rezultadu iha nia modalidade desportiva no nia respeitu boot ba kultura Timor nian no ba família”, nia hatutan katak “ho kualidade rua ne’e nia hasa’e ona ho dignidade no fó ona onra ba Timor-Leste”.

Atleta timoroan na’in-haat mós kompete ona iha bandeira ne’e nia mahon iha Jogu Olímpiku Bailoron nian, tinan 2000, iha Sydney. Liutiha ida ne’e, Timor-Leste, kompete ba-dahuluk ho bandeira Timor nian iha Jogu Olímpiku Atena, iha tinan 2004, no kompete tan iha jogu sira Pequim nian, iha tinan 2008 no iha Londres, iha tinan 2012.

Portavós Governu Konstitusionál V, Ministru Estadu Ágio Pereira, hateten: “ita hahii Yohan tanba ninia kompromisu no ninia orgullu ba Timor-Leste. Ninia esforsu sira, hamutuk ho atleta timoroan sira-seluk ne’ebé reprezenta Timor-Leste iha senáriu internasionál, foti ita-nia rain nia naran no aumenta liután interese no envolvimentu. Hodi Governu nia naran, ita hato’o ba nia boasorte iha ninia prova loron-sabádu no hato’o ita nia parabéns ba buat hirak ne’ebé mak nia hetan ona”.