………………………………………………………………………………………………………………
Díli, Loron 10 Fulan Fevereiru Tinan 2014
Komunikadu Imprensa
Sorumutu extraordinário Konsellu Ministrus loron 10 fulan Fevereiru 2014
Governu hala’o sorumutuk estraordináriu iha Segunda-feira ne’e, loron 10 fulan Fevereiru 2014, iha Ministériu Finansa, iha Dili, no aprova:
1. Dekretu-Governu ne’ebé regula Ezekusaun Orsamentu Jerál Estadu nian ba tinan 2014
Diploma ida ne’e, ne’ebé hetan análize kle’an tebes hosi membru Governu sira, estabelese regra hirak ne’ebé presiza atu ezekuta Orsamentu Jerál Estadu (OJE) nian, ba tinan 2014. Ho Dekretu-Lei Governu nian ida ne’e, hakarak atu garante efetividade no kontrolu ida rigorozu ba orsamentu no disiplina maka’as liu ba gastu públiku sira, tuir aprovasaun polítika nian ne’ebé define ona iha OJE, ba tinan 2014 nian.
Hosi medida oin-oin ne’ebé estabelese ona, buat ida ne’ebé importante mós, atu órgaun Estadu nian sira hotu no servisu sira no fundu autónomu sira, iha obrigasaun atu uza Sistema Informátiku, iha Jestaun Finanseiru, hodi nune’e bele iha transparénsia bainhira ezekuta orsamentu no mós bele fasilita atividade hirak relasiona ho fiskalizasaun hosi parte Parlamentu Nasional nian.