Primeiru-Ministru no Ministru Defeza no Seguransa, Xanana Gusmão, hala’o sorumutuk oioin ho responsável polítiku sira, hodi halo lansamentu ba ninia livru no simu doutoramentu Honoris Causa, iha vizita-traballu ida ne’ebé nia halo iha loron 4 to’o loron 8 fulan Fevereiru nian, iha Lisboa.

Xanana Gusmão mak xefia delegasaun ida ne’e, ne’ebé mak inklui mós Ministru Justisa, Dionísio Babo, Sekretáriu Estadu Defeza, Júlio Tomás Pinto no Juíza Konselleira iha Tribunál Rekursu no Vise-Prezidente Konsellu Superiór Majistratura Judisiál, Meritíssima Juíza Natércia Gusmão, no hahú  ninia vizita ne’e ho sorumutuk ida ho Ministru Administrasaun Interna, Miguel Macedo.

Sorumutuk ho Ministru Administrasaun Interna koa’lia-liu kona-ba protokolu Kooperasaun entre Servisu Migrasaun Repúblika Demokrátika Timor-Leste no Servisu Estranjeiru no Fronteira Repúblika Portugeza nian, protokolu ne’e rasik asina iha loron-sesta, loron 7 fulan Fevereiru, hosi Diretór Nasionál Adjuntu Servisu Migrasaun no Diretór Nasionál Servisu Estranjeiru no Fornteira nian. Protokolu ne’e atu estabelese baze hodi dezenvolve kooperasaun ida iha nível operasionál no tékniku iha matéria jestaun migrasaun no kontrolu fronteira nian sira.

Pedro Passos Coelho, Primeiru-Ministru Portugál nian, simu mós ninia omólogu iha São Bento ba sorumutuk ida ne’ebé Xanana Gusmão koa’lia kona-ba kreximentu país Timor-Leste nian, iha kontestu internasionál no relasaun kooperasaun bilaterál entre país rua ne’e. Iha konferénsia imprensa, Pedro Passos Coelho reforsa apoiu Portugál nian ba Timor-Leste iha área kooperasaun oioin (tékniku-militár, justisa, seguransa,defeza, finansa, edukasaun no munisípiu) nomós kona-ba Prezidénsia Rotativa Komunidade País Lian Portugés nian (CPLP sigla iha lian portugés) no nia hatutan katak nia simu konvite Xanana Gusmão nian atu marka  prezensa iha Simeira Xefe Estadu no Governu CPLP nian, ne’ebé sei hala’o iha fulan Jullu tinan ida ne’e, iha kapitál Timor-Leste.

Hafoin han-meudia ne’ebé oferese hosi Pedro Passos Coelho, Primeiru-Ministru no Ministru Defeza no Seguransa, Xanana Gusmão, simu benvindu ho onra militár iha Forte de São Julião  da Barra, iha Oeiras, ne’ebé nia hala’o mós sorumutuk bilaterál ho Ministru Defeza Nasionál, José Pedro Aguiar-Branco, tuir kedas ho asinatura Programa-Kuadru Kooperasaun Tékniku-Militár Luzo-Timoroan ba tinan 2014-2016.

Akordu ne’e foka liu kona-ba komponente formasaun, iha  dezenvolvimentu lian portugés nian atu nune’e  atividade formasaun sira sei sai di’ak litán no fó prioridade liu ba komponente navál.

Nafatin, iha loron 5 fulan Fevereiru, Xanana Gusmão hasoru malu ho Ministra Justisa, Paula Teixera da Cruz, ne’ebé Ministru Justisa Timor-Leste, Dionísio Babo Soares, ho ninia omóloga asina Protokolu Jerál Kooperasaun iha área Justisa nian.

Iha ninia vizita loron-daruak nian iha Portugál, Primeiru-Ministru dezloka ba sede CPLP nian atu tuir sorumutu Komité Konsertasaun Permanente Estraordinária, ne’ebé sei hasoru malu ho Sekretáriu Ezekutivu CPLP nian, Embaixadór Murade Isaac Murargy, no Embaixadór sira reprezentante Estadu membru sira seluk. Timor-Leste sei simu kna’ar Prezidénsia rotativa CPLP nian ba tinan ne’e, mak sai nu’udar ajenda sorumutu ida ne’e nian maibé Xanana Gusmão ko’alia mós kona-ba potensialidade Komunidade ne’e nian no apela atu halo asaun hamutuk atu nune’e, povu husi nasaun ida-idak bele sente benefísiu CPLP nian.

Sorumutu ida ne’e tuir kedas ho lansamentu livru “Xanana Gusmão no tinan 10 dahuluk Konstrusaun Estadu Timoroan nian”, ne’ebé aprezenta husi Bispu D. Ximenes Belo no Rui Marques (Lusitânia Expresso) no marka prezensa iha ne’ebá eis-Prezidente Repúblika Portugeza António Ramalho Eanes, governante sira, Embaixadór sira no figura sosiedade luzófona nian seluk.

Iha ninia vizita loron ikus nian iha Portugál, loron 7 fulan Fevereiru, Primeiru-Ministru simu benvindu hosi Prezidente Repúblika Portugeza, Cavaco Silva, no nia simu tan doutoramentu Honoris Causa hosi Institutu Superiór Siénsia Sosiál no Polítika Universidade Lisboa nian.

Grau Doutór Honoris Causa fó ba ema-koñesidu sira ne’ebé halo peskiza iha área (arte, siénsia, filozofia, letra sira, promosaun dame nian, ba kauza umanitária no seluseluk tan), tanba ninia reputasaun di’ak, virtude, méritu ka asaun sira servisu nian ne’ebé iha kbiit boot tebes ba família, emar no instituisaun sira. Universidade Lisboa, liuhosi, ISCSP, rekoñese papél determinante Xanana Gusmão nian iha prosesu independénsia, konsolidasaun no dezenvolvimentu Estadu Timor-Leste, ba matéria relevante iha área sira Siénsia Polítika, Estratéjia, Administrasaun Públika no Relasaun Internasionál nian.

Molok halo viajen ba Portugál, Xanana Gusmão halo uluk vizita-serbisu nian ida ba Reinu Unidu, ne’ebé nia hasoru malu ho polítiku no emprezáriu britániku sira atubele ko’alia kona-ba progresu ne’ebé alkansa ona iha Timor-Leste no atuhodi dada investimentu, nia partisipa mós iha abertura ofisiál Embaixada Reinu Unidu nian. Primeiru-Ministru hasoru malu mós ho Sir Elihu Laoderpacht, Profesór Lei Internasionál Universidade Cambridge, ne’ebé foin daudaun reprezenta Timor-Leste iha Tribunál Justisa Internasionál nian.

Hafoin fila-hikas mai Timor-Leste iha loron 11, Primeiru-Ministru dezloka fali ba Jakarta atu tuir sorumutu-serbisu nian.

Bele haree foto kona-ba Vizita traballu ne’e, favor hanehan iha ne’e.