Primeiru-Ministru hala’o vizita ba Reinu Unidu, Portugál no Indonézia
Vizita traballu nian ba Reinu Unidu , loron 31 fulan Janeiru to’o loron 4 fulan Fevereiru
Vizita traballu ida ne’e sei hala’o iha Londres, ne’ebé Primeiru-Ministru sei hasoru malu ho Parlamentu iha Câmara Comun, iha Westminster, atu ko’alia kona-ba progresu ne’ebé Timor-Leste alkansa ona no hodi halo mós diálogu interativu ida.
Prevee mós sorumutu ho membru Comunidade Empresarial Britânica nian atu fó atenbrani hodi dada investimentu internasionál mai iha Timor-Leste.
Viajen ida ne’e hanesan mós biban ida atuhodi hasoru malu ho jurista internasionál sira ne’ebé servisu ba Timor-Leste, iha Londres, no inklui mós resepsaun foun ida iha Embaxada foun Timor-Leste nian iha Londres.
Vizita Traballu ba Portugál, iha loron 4 to’o loron 8 fulan Fevereiru
Durante vizita ida ne’e, ne’ebé sei hala’o iha kapitál portugeza, Lisboa, Primeiru-Ministru sei hala’o sorumutu ho Prezidente Repúblika, ho Primeiru-Ministru no ho membru Governu sira hotu Portugál nian.
Iha vizita ida ne’e, Primeiru-Ministru sei hasoru malu ho Reprezentante Missões Acreditadas nian husi Comunidade Países Língua Portuguesa (CPLP), iha Sede CPLP, ne’ebé mak sei partisipa mós, iha lansamentu, “Livru Xanana Gusmão no konstrusaun Estadu timorense iha tinan 10 ba dahuluk”.
Iha loron ikus vizita nian, Instituto Superior Ciências Sociais e Políticas (ISCSP) sei atribui grau Doutor “Honoris Causa” ba Kay Rala Xanana Gusmão.
Primeiru-Ministru sei husik hela Lisboa iha Sábadu, loron 8, ho destinu mai kapitál Indonézia nian (Jakarta), hodi to’o iha Díli, iha loron 11 fulan Fevereiru.
