Governu Timor-Leste kontinua hametin relasaun ho Rádio Komundade sira, atu disemina informasaun ba públiku no dezenvolve povu nia partisipasaun ba dezenvolvimentu nasionál.
Sekretáriu Estádu Komunikasaun Sosiál, Nelio Isaac Sarmento iha nia diskursu bainhira loke Seminar Nasionál kona-ba Rádio Komunidade ho tema, “Partisipasaun Komunidade ba Dezenvolvimentu Instituisionál Rádio Komunitáriu”, iha Ótél Ramelau, iha loron 16 Dezembru 2013 hateten, Governu nafatin iha kompromisu atu apoia meius komunikasaun sosiál sira, inkluzivamente Rádio Komunidade.
Seminar ne’e organiza husi Sekretaria Estadu Komunikasaun Sosiál, liuhusi Diresaun Nasionál Sentru Rádio Komunidade. Hafoin seminar, kontinua ho treinamentu ba membru Konsellu no Jestór Rádio Komunidade sira durante loron tolu, hahú 17 – 19 Dezembru 2013.
“Ha’u hakarak haree relasaun Rádio Komunidade ho Governu ba futuru, la’os iha ambitu dependensia, maibé iha ámbitu interdependensia intitusionál, atu sai parseiru di’ak. Nune’e, kontinua perzerva ita-nia kultura no halo espansaun ba programa diseminasaun informasaun no edukasaun sívika, iha prosesu demokratizasaun no konstruksaun Estadu“, Nelio Isaac dehan tan.
Maibé ba futuru, Sekretariu Estadu hatutan, nesesita planu integradu ida, partisipasaun komunidade nian boot liu tan. Atu nunee, la bele investe ka apoia iha aspeitu hanesan de’it tinan-tinan, ne’ebé kria dependensia institusionál no implika ba futuru dezenvolvimentu Rádio Komunidade nian.
“Ha’u fiar, imi bele no iha kapasidade atu nakfilak Rádio Komunidade nudár meius komunikasaun komunidade nian ne’ebé kontribui aktivu ba prosesu tomak iha ita-nia nasaun, nia reafirma. Rádio komunidade iha ninia natureza no karater rasik, mai hosi komunidade nia inisiativa komunál. Tanba ne’e, kontinua prezerva partikularidade ne’e ba tempu naruk. Governu nia kompromisu mak kontinua fó apoiu, liu hosi Diresaun Nasionál Sentru Rádio Komunidade. Maibé la’os ho intensaun politika atu sai na’in ka halo intervensaun ba konteudu programa,” Nelio Isaac hateten tan.
Partisipa mós iha Semináriu Nasionál ne’e, Sekretáriu Estadu Desentralizasaun Administrativa, Tomás do Rosário Cabral, Prezidente Komisaun F, Sérgio Hornai, membru Konsellu Board no Jestor Rádio Komunidade hosi distritu hotu no journalista sira.