Programa internasionál “Dezafiu Hamlaha Zero” lansa tiha ona iha Timor-Leste, iha loron 9 fulan Janeiru, husi Primeiru-Ministru, Kay Rala Xanana Gusmão.

Programa ne’e lansa iha Parlamentu Nasionál iha okaziaun vizita ofisiál husi Sua Alteza Real Prinseza Maha Chakri Sirindhorn husi Reinu Tailándia, ne’ebé akompañada husi Sub-Sekretária-Jerál Nasoins Unidas nian, Sekretária Ezekutiva Komisaun Ekonómika no Sosiál ba Ázia no Pasífiku no Konselleira Espesiál Nasoins Unidas nian ba Timor-Leste, Dra.Noeleen Heyzer.

“Dezafiu Hamlaha Zero” ne’e koordena husi Nasoins Unidas no konta ho tulun husi Komisaun Ekonómika no Sosiál ba Ázia no Pasífiku Nasoins Unidas nian no Organizasaun Nasoins Unidas nian ba Ai-han no Agrikultura. Objetivu boot programa ne’e nian maka defende direitu ba ai-han ida ne’ebé maka di’ak no asegura katak sistema alimentár sira sustentavel no sólidu.

Programa ne’e lansadu iha Bankoke, iha tinan 2013, iha prezensa Primeiru-Ministru, Kay Rala Xanana Gusmão nian, iha tempu ne’ebé nia halo vizita ofisiál ba Reinu Tailándia nian. Iha loron Kinta ne’e, sai hanesan tempu Xefe Governu nian fali, hamutuk ho Prinseza Maha Chakri Sirindhorn no Dra.Noeleen Heyzer, halo lansamentu ofisiál “Dezafiu Hamlaha Zero” iha Timor-Leste.