Hodi Ministra Finansas, Emília Pires, nia naran, Vise-Ministra Finansas Santina Viegas Cardoso formalmente distribui pakote husi dokumentu sira kona-ba rejime duodécimo Orsamentu Estadu nian ba Ministériu, Sekretaria Estadu no mós Ajénsia Autónoma sira, iha loron 6 fulan-Janeiru tinan 2014, iha Sentru Koñesimentu Ministériu Finansas nian.

Tau ona orsamentu montante ida ho valór US$ 83.391.165,00 ba ministériu hotu-hotu, ho exesaun ba Fundu Espesiál, atubele kontinua finansia operasaun sira Governu nian, nune’e bele garante katak funsaun sira Estadu nian sei la hetan interrupsaun durante fulan Janeiru ne’e to’o ba aprovasaun ikus ba Orsamentu-Jerál Estadu nian ba tinan 2014.

Oras ne’e dadaun, orsamentu ne’e iha hela diskusaun nia laran iha Parlamentu Nasionál atubele hetan aprovasaun durante fulan Janeiru ne’e. Ekipa téknika husi Ministériu Finansas distribui mós regra no prosedimentu sira ne’ebé maka ministériu no instituisaun Estadu nian sira atu kumpre durante ezekusaun Orsamentu iha rejime duodécimo nian.