………………………………………………………………………………………………………………
Díli, Loron 23 Fulan Dezembru Tinan 2013
Komunikadu Imprensa
Sorumutu estraordináriu Konsellu Ministru nian iha loron 23 fulan Dezembru tinan 2013
Governu hala’o sorumutu estraordináriu iha loron Segunda ne’e, loron 23 fulan Dezembru tinan 2013, iha sala sorumutu Konsellu Ministru nian, iha Palásiu Governu, Dili, no aprova tiha ona:
1. Lisensiamentu Institusionál no Akreditasaun Inisiál Universidade Dili (UNDIL) no Univesidade Orientál Timór Loro-sa’e (UNITAL)
Iha segimentu husi lisensiamentu institusionál no akreditasaun universidade sira, ne’ebé hahú iha tinan 2007, Konsellu Ministru aprova ona akreditasaun Universidade UNDIL no UNITAL, ne’ebé iha hela “Períodu Probatóriu nia laran”.
Iha fulan Outubru tinan ida-ne’e nian, Ajénsia Nasionál Avaliasaun no Akreditasaun Akadémika (ANAAA), organizmu akreditasaun nian ne’ebé iha responsabilidade atu asegura kualidade ensinu superiór iha Timor-Leste, halo avaliasaun foun ida kona-ba Lisensiamentu Institusionál no Akreditasun – faze da-3, UNDIL no UNITAL nian, rekomenda ona akreditasaun ba univesidade rua ne’e, ho kondisaun balun. Painél avaliasaun nian konta ho avaliadór internasionál na’in rua, Prof. Doutór Nirwan Idrus (Malázia) no Doutór Manuel Corpus (Filipina), no mós ho avaliadora nasionál, Sra. Dirce Belo, Ofisiál Kualidade ANAAA nian.
Konsellu Ministru deside atu respeita rekomendasaun husi ANAAA, hodi aprova akreditasaun universidade rua ne’e nian, hodi garante katak ANAAA tenke akompaña kumprimentu kondisaun sira ne’e nian. Ajénsia ne’e mós tenke monitoriza universidade hirak ne’ebé hetan tiha ona akreditasaun uluk ona.