Governu Timor-leste, liuhusi Ministériu Solidaridade Sosiál no Prezidénsia Repúblika, organiza Serimónia Onra Fúnebre ba Mártir Libertasaun Nasionál, hamutuk na’in 146 iha semitériu Jardin Erói, Metinaro, Dili.

Serimónia funerál ne’ebé monu loos iha loron 7 Dezembru 2013, invazaun Indonezia nian ba Timor-Leste, ne’ebé asiste husi Prezidente Repúblika, Taur Matan Ruak, Prezidente Parlamentu Nasionál, Vicente Guterres, membru Parlamentu Nasionál sira, Vise Primeiru-Ministru, Fernando de Araújo, membru Governu, Eis Titulár sira, membru família sira no komunidade.

Iha nia diskursu serimónia fúnebre boot badatoluk ne’e, Prezidente Repúblika, Taur Matan Ruak hateten, povu no nasaun fó onra ba erói no Mártir Libertasaun Nasionál sira, ne’ebé fó sira-nia vida hodi sosa ita nia liberdade no independénsia.

“Ita-nia nasaun hakruuk ba memória asuwain feto no mane sira-ne’e, tanba sakrifika aan atu kontribui ba nasaun nia liberdade. Nune’e, ohin-loron bele harii nasaun ida ho dignidade,” Prezidente Taur hateten.

Xefé Estadu mós reafirma, aswa’in sira-nia klamar akompaña no fó nafatin kbiit ba timoroan sira, atu dezenvolve rai-ne’e, hodi hadi’a kondisaun móris nian, hodi la haluha faluk, oan ki’ak no família husi asuwa’in sira.