Governu Timor-Leste kontinua buka hametin relasaun ho Komunidade Internasionál, liuhusi organizasaun Internasionál sira, hanesan Organizasaun African, Caribbean and Pacific (ACP) no European External Action Service (EEAS).

Iha nia vizita ba Bruxela, Belgica, segunda-feira (9/12), Ministru Negósiu Estranjéiru no Kooperasaun (MNEK), José Luís Guterres, informa kona-ba situasaun paz iha Timor-Leste no prosesu dezenvolvimentu kontinua la’o iha aspetu oinoin.

Ba organizasaun ACP, Ministru José Luís Guterres, hato’o mós kompromisu atu apoia atividade sira, tanba Timor-Leste mós sai ona membru. Maibé, husu atu ACP hato’o prioridade apoiu ba atividade sira hodi kontribui ba progresu dezenvolvimentu Timor-Leste nian.

Sekretáriu Jerál ACP, Alhaji Muhammad Mumuni, sente kontenti ho vizita Ministru José Luís Guterres. Mumuni afirma, Timor-Leste iha kredibilidade tebes no sai ezemplu di’ak ba ACP. “Ami mós kontente wainhira rona Timor-Leste fó apoiu ba nasaun Guinea Bissau,” Mumuni hateten.

Entertantu iha enkontru ho Managing Directór for Asia and Pacific, Viorel Isticioaia-Budura no Diretór Geral DEVCO (Development et Cooperation), Fernando Frutuoso de Melo husi EEAS, Ministru José Luís Guterres hato’o ninia agradesimentu tanba iha vizaun globál, hodi fó apoiu ba nasaun ki’ík sira hodi hamenus ki’ak.

Durante sorumutu bilaterál ne’e, akompaña mós hosi Embaixadór Timor-Leste ba Bruxela, Belgia, Nelson dos Santos, Diretór Nasionál Pasífiku, Aleixo da Silva no Adjuntu National Authorizing Officer (NAO), Madalena Hanjam Costa Soares.