……………………………………………………………………………………………………………..
Dili, Loron 10 Fulan Desembru Tinan 2013
Komunikadu Imprensa
Sorumutu Konsellu Ministru ha loron 10 fulan Dezembru tinan 2013
Governu hala’o sorumutu iha loron Tersa ne’e, loron 10 fulan Dezembru tinan 2013, iha sala sorumutu Konsellu Ministru nian, iha Palásiu Governu Dili no aprova ona:
1. Lutu Nasionál hodi Fó Onra ba Nelson Mandela
Governu Repúblika Demokrátika Timor-Leste dekreta ona, iha sorumutu Konsellu Ministru nian iha loron 10 fulan Dezembru tinan 2013, Lutu Nasionál iha territóriu nasionál tomak, nu’udar sinál lutu nian ba antigu Prezidente Áfrika Sul nian no Prémiu Nobel Dame nian, Nelson Rolihlahla Mandela, ba ninia mate. Períodu Lutu Nasionál hahú iha tuku 00.00 loron 11 fulan Dezembru no sei remata iha tuku 24.00 loron 13 fulan Dezembru nian.
Durante períodu Lutu Nasionál nian Bandeira Nasionál tenke hasa’e to’o meiu-mastru de’it, iha edifísiu públiku hotu-hotu, inklui embaixada sira, konsuladu sira ka reprezentasaun sira seluk Estadu nian iha rai-li’ur, nune’e mós iha embarkasaun sira Estadu nian.
2. Rezolusaun ne’ebé nomeia Sekretáriu Ezekutivu Komisaun Nasionál Kombate HIV SIDA Timor-Leste nian
Konsellu Ministru nomeia ona Exmu. Sr.Dr.Daniel Marçal ba hala’o knaar Sekretáriu Ezekutivu Komisaun Kombate HIV-SIDA Timor-Leste nian, ne’ebé mak Governu kria ona foin lailais ne’e.